Sinuspenso ti Land Transportation Office (LTO) ti lisensia ti drayber ti sports utility vehicle (SUV) a nangdungpar kadagiti tao iti entrada ti departure area ti Ninoy Aquino International Airport (NAIA) Terminal 1, a nakatayan ti dua a tao agraman ubing a babai, ken nangdangran iti 3 a tao idi Domingo, Mayo 4.
Segun kadagiti report, napasamak ti aksidente iti 8:00 iti bigat idi Mayo 4 iti departure area ti NAIA Terminal 1 iti Siudad ti Pasay.
Addan iti kustodia ti PNP Aviation Group ti drayber ti nangisit a Ford Everest nga addaan plaka a DCB 311. Segun iti imbestigasion, kinuna ti drayber a pumanaw koman daytoy idi kellaat nga adda kano nakitana a maysa nga SUV a lumabas iti masanguananna. Nagdanag ti drayber ket imbes a preno, ti met siliniador ti nabaddekanna.
Segun ken ni Col. Joselito de Sesto, hepe ti Pasay City Police, nabigbig ti 5-anios nga ubing a babai nga agnagan iti “Maliya,” anak ti maysa nga Overseas Filipino Worker (OFW). Agnagan met iti “Dearick,” 28, ti maysa pay a natay. "Died on the spot" dagiti dua a biktima.
Nadunor met da Edita Soriano, 61; Cynthia Masongsong, 33; ken Safiya Masongsong, 7, ket naitaray dagitoy iti San Juan de Dios Hospital.
Awan ti pangta ti kudeta iti biang ti AFP - Gen. Brawner
Kinuna ni Sekretario ti Department of Transportation (DOTr) Vince Dizon nga itaklinnan iti Philippine National Police (PNP) ti panagimbestigar iti insidente.
Binabalaw ni Dizon dagiti content producer ken vlogger a pagkuarkuartaanda ti napasamak babaen ti panangipaskilda iti ladawan ken video dagiti biktima iti social media.
Kiniddaw ni Dizon kadagiti vlogger a raemenda koma ti privacy dagiti biktima ken dida koma gundawayan ti panagladingit dagitoy.
Iti sabali a bangir, kinuna ni Ramon S. Ang, presidente ti New NAIA Infra Corp. (NNIC), nga ibaklayna ti amin a babayadan dagiti uppat a nayospital, ken mangipaay iti tulong a pinansial kadagiti pamilia ti dua a natay iti aksidente. (Aaron Recuenco/Manila Bulletin/Lito Hilidon/Bannawag)
