Uppat nga ubbing a magagaran a mapan iti youth camp, ken ti agassawa a kayatda ti maaddaan iti oras iti 2-anios nga anakda a milagro a nakalasat iti narakrak a luganda.
Dagitoy, ken ti uppat pay a nairaman a natay iti aksidente iti SCTEX toll plaza, ti nakalkaldaang a pakasaritaan no ania ti mapasamak no saan nga ipangag dagiti drayber dagiti maulit-ulit a pakdaar ken palagip maipapan iti kinatalged iti kalsada. Masansan a mapasamak dagitoy, ket iti kaso ti Filipinas segun iti datos ti United Nations, agarup 32 a tao ti matay iti inaldaw gapu iti aksidente iti kalsada.
Ngem saan nga agpatingga dita ti nakalkaldaang a pakasaritaanda, ta nupay adda maawat ti tunggal maysa kadagiti 33 a nadangran a pasahero ti bus a ₱100,000 a bayadan ti insurance--ken ti kangatuan a ₱400,000 no bilang ta adda matay--saan a mairaman iti daytoy dagiti pasahero ti lugan a maibilang a saan a public utility vehicle (PUV), kas iti kasasaad dagiti 10 a natay iti aksidente iti SCTEX a nakalugan kadagiti pribado a vehicle, maibatay iti agdama a road accident insurance rules.
Iti maysa nga statement, kinuna ni daulo ti Land Transportation Franchising and Regulatory Board (LTFRB) Teofilo Guadiz III a kalpasan ti aksidente iti SCTEX, binilinna ti Passenger Accident Management and Insurance Agency (PAMI) nga iproseso ken iruarda a dagus ti insurance para kadagiti biktima.
Saanmi a pangpangtaan ti asino man --Malakanyang
Ngem inlawlawag ti LTFRB a dagiti saan a pasahero ti bus--kas kadagiti pedestrian wenno adda iti sabali a lugan (saan nga iti PUV)--agdagup iti ₱200,000 ti kangatuan a bayad a mabingay dagiti amin a naapektaran a tao.
Kaipapanan daytoy a dagiti 10 a natay iti aksidente iti SCTEX ket saan a makaala iti ₱400,000 ta maibilangda a kas “occupants of other vehicles” isu a ₱200,000 laeng ti maalada ket mabingbingay pay daytoy iti bilang dagiti naapektaran.
Daytoy ti pakaseknan dagiti transport leader kas ken ni Alliance of Transport Operators and Drivers Association of the Philippines (ALTODAP) Boy Vargas a nabayagen a mangitantandudo iti nainkalintegan a panagbayad iti insurance, kangrunaan iti babaen ti Compulsory Third Party Liability (CTPL) a masapul a bayadan dagiti motorista iti tunggal panagrehistro ken panangpabaro iti rehistro ti lugan.
Kiniddaw ni Vargas kada Presidente Marcos Jr. ken Sekretario ti Department of Transportation (DOTr) Vince Dizon a tamingenda koma daytoy a parikut babaen ti panangbilinda iti Insurance Commission a mangidaulo iti pannakarepormar ti panagbayad ti insurance a pagnumaran ti minilion a motorista nga agus-usar iti kalsada.
Mairaman iti kiddawda ti pannakabukel ti baro a paglintegan a mangpapardas iti pannakaproseso ken pannakairuar ti bayad ti insurance no adda mapasamak nga aksidente iti kalsada. (Aaron Recuenco/Manila Bulletin//Lito Hilidon/Bannawag)
