Nakipaset ni agngayangay a senador Camille Villar iti pannakarambak ti Bangus Festival iti Dagupan, Pangasinan, a nangyebkasanna iti natibker a pananginanamana para iti agtultuloy a panagdur-as ti lokal nga industria ti bangus.
Nakaragragsak ni Villar, a maysa a millennial candidate iti 2025 elections, bayat ti pannakipasetna iti Bangusan Street Party, a nakaitampokan ti nakapimpintas a pannakaidispley ti 20,000 a pedaso ti bangus a naituno iti 1,100 a pagtunuan iti igid dagiti kalsada ti siudad.
“Saan laeng a panangramabk ti Bangus Festival iti nalabon nga apit ti Dagupan, no di ket maysa pay a pammadayaw kadagiti umili a ti napinget a panagtrabahoda ti mangpadpadur-as iti industria ti aquaculture,” kinuna ni Villar.
Impaganetgetna ti kinapateg ti nasao nga aktibidad kas simbolo ti kultural a pakabigbigan ti siudad ken kinapigsa ti ekonomia, a nairamut iti nabayagen a kontribusion ti Dagupan iti sektor ti aquaculture ti pagilian.
Camille Villar, naalana ti suporta ti Mayor ti Dasmariñas
Kalpasan ti pannakipasetna iti piesta, inkari ni Villar nga itultuloyna ti panangitandudona kadagiti gannuat a mangsuportar kadagiti lokal a mannalon ken mangngalap, nangruna iti Pangasinan a nakapatpateg ti akem ti aquaculture iti panagbiag ken panagdur-as.
Ti Bangus Festival, a tinawen a maangay iti Dagupan, ket maysa kadagiti masegseggaan a kultural a pagteng ti Filipinas, a mangaw-awis iti adu a sangaili manipud iti entero a pagilian tapno rambakanda ti patpatgen a produkto ken tawid ti siudad.
