Rinugianen ti Commission on Elections (Comelec) ita a Martes, Mayo 6, ti umuna a pannakaipatulod dagiti opisial a balota para iti National Capital Region (NCR), innem nga aldaw sakbay ti midterm elections.
Impakaammo ni Comelec Chairman George Erwin Garcia ti pannakaitulod ti amin a 7.5 a milion a balota a nailatang para kadagiti botante ti NCR kalpasan ti pannakaitulod dagiti balota iti dadduma a rehion, a naipan iti opisina ti municipal ken city treasurer.
Kinuna ni Garcia a rugiandan ti maudi a shipment dagiti balota iti nadumaduma a lugar iti NCR kas iti Caloocan, Marikina, Pasig, Valenzuela, Quezon City, Malabon, Navotas, ken San Juan.
Maitulod dagiti opisial a balota iti Muntinlupa, Pateros, Taguig, Manila, Makati, Pasay, Las Piñas, Mandaluyong, ken Parañaque iti sumaruno nga aldaw.
VP Sara, tinagibassitna ti impeachment complaint iti Kamara
Dinadagadag ni Garcia dagiti partido politikal, kandidato, maseknan a grupo, ken citizen's arm a mangibaonda kadagiti pannakabagida iti opisina ti local treasurer tapno saksianda ti pannakaitulod dagiti balota.
Agtalinaed pay laeng dagiti balota iti opisina ti lokal treasurer agingga a mayawat dagitoy kadagiti kameng ti electoral board, a manamnama a maiwaras inton Domingo wenno agsapa ti Lunes.
Impaganetget ti Comelec ti kinatalged ti pannakaitulod dagiti balota, idinto a seliado dagiti trak nga us-usarenda, agraman dagiti election paraphernalia.
Inlawlawag ni Garcia nga adda serial number ti amin a selio nga ikabkabilda isu a nabilangda amin dagitoy.
Kinuna ni Garcia nga iti kanito a napugsat ti plastic seal nga inkabilda apaman a sumangpet iti lugar a pakaipananda, kaipapananna a nakompromison daytoy. Isu a rumbeng nga ammuen ti election provider ti serial number a nausar kadagiti trak.
Innayon ni Garcia a suksukimatenda ti pasilidad dagiti pagadalan nga agpaay a polling precinct, ket isagsaganada ti nasapa a panagbotos. (Dhel Nazario/Manila Bulletin//Lito Hilidon/Bannawag)
