Kiniddaw ti abogado ni dati a presidente Rodrigo Duterte ti pannakadiskualipikar ti dua a hues ti International Criminal Court (ICC) Pre-Trial Chamber I (PTC1) gapu ta nagdesisiondan iti isyu ti hurisdiksion ti ICC iti kaso ti dati a presidente.
Iti dokumento nga indatag ti abogado ni Duterte a ni Nicholas Kaufman idi Mayo 12 ken naiturong iti "The Presidency," kiniddawna a mailaksid koma dagiti dua a hues, da María del Socorro Flores Liera ken Reine Adélaïde Sophie Alapini-Gansou, iti panangikeddeng iti isyu ti hurisdiksion.
Segun ken ni Kaufman, masapul a mailaksid dagiti dua a hues tapno masigurado ti naanayas a pannagna ti proseso ken masalakniban ti kalintegan ni Duterte a maaddaan iti patas a panangukom.
Malaksid iti daytoy, kiniddaw pay ni Kaufman a saan koma a mairaman ni Alapini-Gansou nga agdesision iti kiddawda.
Kameng da Liera ken Alapini-Gansou ti napalabas a chamber a nangipalubos iti ICC prosecutor nga agimbestigar iti war on drugs ni Duterte idi 2021 nupay nagikkaten ti Filipinas iti ICC idi Marso 2019.
Balido latta ti warrant of arrest ni Dela Rosa --Malakanyang
Paset pay ida ti chamber a nangipalubos iti pannakaituloy ti imbestigasion idi 2023.
Indatag manen ti defense team daytoy a kiddaw kalpasan a di pinatgan ti PTC1 idi Mayo 6 ti kiddaw dagiti abogado ni Duterte a saan koman a makibiang dagiti dua a hues iti isyu ti hurisdiksion ti ICC iti kaso ni Duterte, idinto nga addaandan iti natibker a kapanunotan maipapan iti hurisdiksion.
Kinuestionar ti defense team ti hurisdiksion ti ICC, ta nagikkaten ti Filipinas iti ICC idi Marso 2019 sakbay pay a narugian ti preliminary investigation idi 2021.
Ngem anamongan ti Korte Suprema ti Filipinas ken ICC nga adda hurisdiksion ti international court kadagiti krimen a naaramid iti Filipinas agingga idi pormal a nagikkat ti Filipinas iti ICC idi Marso 2019. (Raymund Antonio/Manila Bulletin//Lito Hilidon/Bannawag)
