Nangabak a kas baro a gobernador ti La Union ni agdama a Bise Gobernador Mario Eduardo Ortega kalpasan nga inabakna iti kalkalpas nga eleksion ti apokona (grandniece) nga agdama a gobernador a ni Raphaelle Veronica Ortega-David.
“Kadakayo amin a nangsuportar kaniak iti amin a tawtawen, naimpusuan a panagyamanko. Ammo ti Dios a talaga a tarigagayko daytoy (kinagobernador) 10 a tawenen ti napalabas. Naruay ti intay' isayangkat,” kinuna ni Ortega iti video a naipaskil iti social media account-na.
Segun iti partial ken unofficial a resulta ti Commission on Elections manipud 1:30 p.m. idi Mayo 14, addan nasurok a 273,000 a botos ni Ortega, idinto a nakagun-od met ni Ortega-David iti nasurok a 178,000, maibatay iti election returns manipud iti 829 iti 840 a clustered precincts.
Nakasigurado metten ti balligi ti running mate ni Ortega a ni Eric Sibuma a kas bise gobernador, a nangabak iti kabalubalna a ni Thomas Dumpit Jr.
Gobernador, bise gobernador ti Pangasinan, nailayon
Iti kinakongresman, nailayon dagiti incumbent a da Paolo Ortega V (umuna a distrito) ken Dante Garcia (maikadua a distrito).
Dagiti 10 a nabotosan a kameng ti Sangguniang Panlalawigan ket dagiti reeleksionista a board member a da Maria Rosario Eufrosina Nisce, Gerard Ostrea, ken Aaron Kyle Pinzon; ken dagiti baro a nabotosan a board member a da Miguel Corleone Magsaysay ken Ernesto Rafon para iti umuna a distrito. Iti maikadua a distrito, ni reeleksionista a board member Ruperto Rillera Jr. ken dagiti kabbotos a board member a da Alyssa Kristine Sibuma, Teresita Garcia, Eulogio Clarence Martin De Guzman III, ken Jeferson Fernando.
Improklamaren ti Provincial Board of Canvassers dagiti nangabak. (Hilda Austria/PNA)
