Tallo a language training center ti impaserra ti Department of Migrant Workers (DMW) gapu iti maipagarup a pannakairamanda iti illegal recruitment ken human trafficking kadagiti operasion nga insayangkatda iti Bulacan ken Cebu idi Mayo 16.
Naibilin a maiserra ti IWA Language Learning Center iti Malolos, Bulacan; Aseanway Learning and Development Center iti Calumpit, Bulacan; ken ti Aseanway Learning and Development Center Cebu branch iti Lapu-Lapu City.
Inlawlawag ti DMW nga ita laeng a tawen a nangrugi ti operasion ti IWA Language Training Center a mangirekomendar kadagiti estudianteda iti kaasmangda a recruitment agency kalpasan ti panagsanayda.
Aggatad a ₱50,000 agingga ₱70,000 ti maipagarup a dawdawaten ti language center kadagiti estudianteda a kasukat ti trabaho iti Japan, Korea, ken dadduma a pagilian iti Europa kas factory workers, hotel staff, agriculture workers, ken fruit pickers.
Segun ken ni Undersecretary for Licensing and Adjudication Services ti DMW Bernard Olalia, saan nga autorisado dagitoy a language center a mangala ken mangirekomendar kadagiti mapan agtrabaho iti ballasiw taaw.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Innayon ni Olalia a kastoy met laeng ti modus dagiti dua a language center.
Insayangkat ti DMW ti naan-anay a pannakaimbestigar iti kinasiasino dagiti nairehistro nga akinkukua kadagiti establisiemiento gapu iti posibilidad a maysa laeng a tao wenno pamilia ti mangpatpataray iti daytoy a negosio. (Martin Sadongdong/Manila Bulletin//Lito Hilidon/Bannawag)
