Gapu iti kaadu ti "functional illiterate" iti rehionna, ginutigot ni Cagayan de Oro City 2nd District Rep. Rufus Rodriguez ti gobierno a mangilatang koma iti kagudua kadagiti 16,000 a baro a pagsaadan dagiti mannursuro a mapataud itoy a tawen para iti Mindanao.
Segun ken ni Rodriguez, a nabotosan manen a kas diputado, kiniddawna iti Department of Budget and Management (DBM) ken iti Department of Education (DepEd) nga mangilatangda koma iti 8,000 a baro a pagsaadan dagiti mannursuro tapno makakamakam ti Mindanao iti Visayas ken Luzon iti beddeng ti edukasion.
Kinuna ni Rodriguez a kasapulan ti Mindanao ti ad-adu pay a mannursuro, panagsanay dagiti mannursuro, ken ad-adu pay nga impraestruktura ken ramit tapno mataming ti “functional illiteracy,” a kaaduan iti deppaar ti abagatan, segun iti report ti Philippine Statistics Authority (PSA).
Naiparang iti report ti PSA a 18.9 a milion a Filipino a nagturpos iti sekondaria iti baet ti 2019 ken 2024, ti maibilang a "functional illiterate," a kaipapananna, kabaelanda ti agbasa, agsurat, ken agkuenta ngem saanda a matartarusan ti basbasaenda.
Walo kadagiti 10 a probinsia nga addaan iti kaaduan ti "basic illiteracy” rate ket adda iti Mindanao: Tawi-Tawi (36 porsiento), Davao Occidental ken Basilan (23 porsiento), Sarangani (18 porsiento), Lanao del Sur (17 porsiento), Zamboanga del Sur (16 porsiento), ken Sultan Kudarat (14 porsiento).
Tallo a bagyo iti ruar, uneg ti PAR, bambantayan ti PAGASA
Segun iti DBM, ti 16,000 a pagsaadan dagiti mannursuro ket buklen ti 15,343 para kadagiti Teacher 1 (Salary Grade 11), 157 ti para kadagiti special science teachers (SG 13), ken 500 ti agpaay kadagiti special education teachers (SG 14). (Ellson Quismorio/Manila Bulletin//Lito Hilidon/Bannawag)
