Inwaragawag ti Department of Justice (DOJ) ita a Huebes, Mayo 22, a kiddawenda ti pannakakanselar ti pasaporte ni dati a pannakangiwat ti presidente Harry Roque kalpasan ti pannakaipaulog ti warrant of arrest kontra kenkuana.
Kinuna ni Justice Secretary Jesus Crispin C. Remulla kadagiti agiwarwarnak: “Aramidenmi daytoy ket apaman a makanselar ti pasaportena, agbalinto isunan nga undocumented alien.”
“No awanan isuna iti asylum ken makanselar ti pasaportena, masapul a maideportar isuna,” kinuna pay ni Remulla.
Nangipaulog ti Angeles City regional trial court (RTC) iti arrest order kontra ken ni Roque ken dagiti kakaduana nga akusado gapu iti non-bailable charges a qualified human trafficking.
Nairaman dagiti kaso ti mapapati a kriminal nga aktibidad ti Lucky South 99, maysa a Philippine Offshore Gaming Operator (POGO) iti Porac, Pampanga nga inserra ti gobierno.
Rali ti INC, nayakar iti Manila
Nagaplikar ni Roque iti asylum iti gobierno ti Netherlands ngnem saan pay a naaksionan ti aplikasionna.
Inadmitir ni Remulla a masapul a malpas pay ti asylum application sakbay nga adda agtignay iti pannakaideportar ni Roque.
Ngem inyebkasna ti panagtalekna a “saan a paboran ti Netherlands ti pannakaaramid kadagiti krimen a nakaidaruman (ni Roque) iti daytoy a kaso.”
Malaksid iti panangkiddaw ti DOJ iti pannakakanselar ti pasaporte ni Roque, immunan nga imbaga ti DOJ a kiddawenda iti International Criminal Police Organization (Interpol) a mangipaulog iti red notice a mangidawat kadagiti ganggannaet a gobierno a mangtiliw ken mangisuko ken ni Roque iti kustodia ti Filipinas. (Jeffrey Damicog/MANILA BULLETIN)
