Winaswas ti Commission on Elections (Comelec) ti petision a pannakadiskualipikar ti Bagong Henerasyon (BH) Party-list, a mangitunda iti opisial a pannakaiproklamarda a nangabak iti 2025 midterm election.
Iti resolusion nga impaulog ti First Division ti Comelec idi Mayo 22, winawasda ti petision nga impila ni Russel Stanley Geronimo a maibusor BH Party-list maigapu iti teknikalidad.
Ti BH, a nakaalaa iti maysa a pagsaadan iti Kamara, ti maysa kadagiti 54 a nangabak a party-list iti kallabes a panagbobotos, ngem naitantan ti pannakaiproklamarda gapu iti nakapila a kaso.
Winaswas ti Comelec ti kaso gapu ta saan a personal nga inikkan ni Geronimo iti kopia ti petision ti nominee ti BH, a kasapulan, kas maibatay iti Section 5 (5), Rule 5 ti Comelec Resolution No. 9366.
Idi Mayo 14, impila ni Geronimo ti petition for disqualification kontra iti BH party-list ken dagiti nominee a da Bernadette Herrera, Robert Gerard Lopez Nazal Jr., ken Maria Editha Tan Alcantara, gapu iti maipagarup a panaglabsing iti paglintegan a pannakibiang ti publiko nga opisial ken empleado iti politikal nga aktibidad, ken panagusar iti pondo ti gobierno iti panagkampania.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Segun iti Comelec, inikkan ni Geronimo iti kopia ti petision dagiti respondent babaen ti email, ngem saanna ida a personal nga inikkan iti kopia wenno dina inlawlawag no apay a dina naaramid daytoy.
Innayon ti Comelec a saan a nangted ni Geronimo iti kopia ti Certificate of Nomination-Certificate of Appreciation of Nomination (CON-CAN) a kasapulan tapno maberipikar dagiti impormasion a nadakamat iti petision kas iti nagan ti party-list, organisasion wenno koalision, nagnagan ken address dagiti nominee ken dadduma pay nga impormasion.
Iti maysa nga statement, kinuna ti BH a ti pangngeddeng ti Comelec ti pakakitaan iti kinatibker dagiti demokratiko nga institusion ti pagilian--a mabalin a kuestionaren, ngem natibker, patas, ken nainkalintegan. (Joseph Pedrajas/Manila Bulletin//Lito Hilidon/Bannawag)
