Opisial nga indeklarar ti Department of Agriculture (DA) ti Nueva Vizcaya a kas "Ginger Capital of the Philippines."
Naibatay ti deklarasion iti Administrative Order No. 8, Series of 2025, a pinirmaan ni Sekretario ti DA Francisco Tiu Laurel.
Ti Nueva Vizcaya ti kangrunaan a paggapuan iti laya, saan laeng nga iti probinsia, no di ket pay iti Luzon, kangrunaan iti Metro Manila.
Maysa met a kangrunaan nga agricultural trading hub iti Rehion 2 (Cagayan Valley) ti Nueva Vizcaya, a nakailako iti 14,753.51 a tonelada metrika (MT) ti laya idi 2024.
Nabotosan, baro nga opisial ti Ilocos Sur Provincial Capitol Press Corps
Nagranggo nga umuna ti probinsia iti pagillian iti produksion ti laya idi 2024, nga addaan total production volume a 7,140.76 MT. Aganay met a 5,010 dagiti mannalon nga agmulmula iti laya iti probinsia.
Addaan total land area a 862.82 nga ektaria ti mamulmulaan iti laya iti Nueva Vizcaya ken addaan iti avergae yield a 7.42 MT iti kada ektaria idi 2024.
Nagyaman ni Gobernador Jose V. Gambito iti DA gapu iti pammigbig a mangpadayaw iti dedikasion ken kinatibker dagiti mannalon ti Nueva Vizcaya, ket saan laeng daytoy a balligi ti probinsia no di ket pay dagiti mannalon a Novo Vizcayano.
Innayon ni Gambito nga agtultuloy ti panangipaayda iti suporta ken gundaway tapno mapasayaat pay ti industria ti laya iti Nueva Vizcaya ken mangsigurado a magun-od dagiti mannalon ti panagrang-ay. (Liezle Basa Iñigo/Manila Bulletin//Lito Hilidon/Bannawag)
