Dinayyeg ti magnitude 5.4 a ginggined ti Northern Luzon ita nga aldaw, Mayo 24, a narikna met kadagiti kabangibang a probinsia, segun iti Philippine Institute of Volcanology and Seismology (Phivolcs).
Maibatay iti Earthquake Information No. 1 ti Phivolcs, tectonic ti ginggined a napasamak itay 10:36 ti agsapa. Masarakan ti epicenter ti ginggined iti 31 a kilometro iti amianan a laud ti Luna, La Union.
Segun iti Phivolcs, narikna ti Intensity IV kadagiti siudad ti Candon ken Vigan iti Ilocos Sur; idinto nga Intensity III iti Sinait, Ilocos Sur.
Intensity II met ti narikna dagiti adda iti Bangued, Abra; Tagudin, Ilocos Sur; San Fernando ken Aringay, La Union; agraman ti ili ti Bani, Infanta, ken Bolinao iti Pangasinan.
Nueva Vizcaya, ginger capital ti Filipinas
Narikna pay iti Siudad ti Baguio ti Intensity I.
Kinuna ti Phivolcs nga awan pay ti naawatda a report a nadadael wenno nadangran gapu iti dayyeg, ngem ekspektaren dagiti aftershock bayat nga imon-monitor-da ti situasion. (Jel Santos/Manila Bulletin//Lito Hilidon/Bannawag)
