KAYATYO ti maaddaan iti ad-adu nga apit ken ganansia no agmulakayo iti lasona? Padasenyo man a suroten daytoy napasayaat a wagas ti panagmula iti lasona.
Dagitoy sumaganad a wagas, naibasar iti panagadal nga insayangkat dagiti agsuksukisok iti Mariano Marcos State University (MMSU), Research Directorate a nakairaman da Dr. Dionisio S. Bucao, agdama a director ti MMSU-Research Directorate; Mr. Jilvess Jimenez, Prof. Raymund Julius Rosales, Dr. Jocelyn Bernabe, Ms. Noralyn Legaspi, ken Dr. Menissa Antonio.
1. As-assideg a panagmula. No off-season planting (Pebrero ken Marso), agmula iti kaassideg a 15cm x 10 cm. No met regular season (Oktubre agingga iti Disiembre), agmula iti kaassideg a 15 cm x 15 cm. Makausar iti 1,000 a kilo iti lasona iti tunggal ektaria iti regular season idinto a 1,500 a kilo met no off-season ti panagmumula.
2. Alep-epan dagiti mula. Agusar iti garami a kas alep-ep. Babaen daytoy a wagas, mapagtalinaed ti dam-eg ti daga ken makatulong a manglapped iti panagtubo dagiti ruot. Sakbay nga agalep-ep, agpasuyot iti pre-emergence herbicide tapno malapdan ti panagtubo ti ruot.
TULONG ITI MANNALON: Aglako Man Met iti Patubo nga Alukon
3. Panagabono. Warakiwakan ti pagmulaan iti lima (5) a tonelada a vermicompost tunggal ektaria. Kalpasanna, abonuan iti 300 kilo wenno 6 a sako nga ammonium phosphate sakbay wenno kalpasan iti panagmula. Pasarunsonan nga abonuan iti 100 a kilo wenno 2 a sako a muriate of potash (0-0-60) ken 100 a kilo wenno 2 a sako a sulfate (21-0-0) no agrukod ti alsem ti daga iti 6.51 agingga iti 7.5. No 6.50 agpababa ti alsem iti daga, napimpintas nga aramaten ti 45 kilo, wenno sangasako a urea. Maibalakad ngarud ti panangpaamiris iti daga a pagmulaan tapno ammo no ania nga abono ti aramaten. Agbatay iti aldaw a panagmula ti iskediul ti maikadua a panagabono. Agabono 15-18 nga aldaw sakbay ti panagmula, no off-season ti panagmula; 21-28 nga aldaw met sakbay ti panagmula, no regular season.
4. Panagpasuyot. Agpasuyot iti pestisidio (fungicide ken insecticide) ken foliar nga abono 15 ken 30 nga aldaw kalpasan ti panagmula.
Mabalin nga umadu ti apittayo agingga iti 62 a porsiento no suroten a nasayaat dagitoy a wagas.—O
