Inyalat ti ili ti Aritao ti titulo a grand champion iti Grand Ammungan Festival 2025 Street Dancing Competition a naangay iti Nueva Vizcaya Sports Complex iti Bayombong, Nueva Vizcaya idi Mayo 24, 2025.
Nagun-od ti Aritao ti gunggona a ₱150,000.
Ti naganaygay ken aggigiddan a panagsalada ti nangitunda, saan laeng ti panangyalatda iti kampeonato, no di ket pay ti special award a Best in Street dance ken Best in Ritual, a nangipasigurado iti panangiturayda iti kompetision ita a tawen.
Daytoy ti maikadua a panangabakda iti las-ud ti lima a tawen, a nangipakita iti agtultuloy a kinalaingda iti kultural a panagsala.
Mangngabel ken dumadait ti Ilocos Norte, pinadayawanda ti bandera ti Filipinas bayat ti Palarong Pambansa
Imparang dagiti dancer ti Aritao ti kadawyan a pammati mainaig kadagiti espiritu nga agindeg kadagiti kabakiran, a mapapati a mangpataud iti sakit no mariribuk. Babaen dagiti panagtignay a mangipakita ken mangisarita, imparang ti Aritao a paset ti lokal a tradision ti panangraem iti nakaparsuaan. Naipakita iti panagsalada dagiti ritual ti panangagas, panangidaton, ken pannakikappia kadagiti di makitkita a puersa, a nangipakita it nabaknang a naespirituan a tawid dagiti umili.
Sangapulo ket maysa nga ili ti Nueva Vizcaya ti nakipaset iti Street Dancing Competition kas pannakarambak iti Ammungan Festival itoy a tawen.
Inyalat ti ili ti Bambang ti umuna a gunggona ken Best in Costume, idinto a maikadua a gunggona ti naala ken Best in Choreography ti inyalat ti ili ti Bagabag.
Ti ili ti Villaverde ti nangyalat iti maikatlo a gunggona; idinto maikapat a gunggona ti inyalat ti Dupax del Sur. (Vizcaya Reporter//Lito Hilidon/Bannawag)
