Inarestar dagiti immigration police ti Timor-Leste ni dati a kongresman ti 3rd District ti Negros Oriental Arnolfo A. Teves Jr., kas kinompirmar ti abogadona a ni Ferdinand Topacio ita nga aldaw, Mayo 28.
Segun ken ni Topacio, kinemmeg dagiti immigration police ni Teves iti agarup 8:00 iti rabii (oras iti Timor-Leste) idi Mayo 27 iti balayna iti Dili, kaduana ti abogadona iti Timor Leste a ni Dr. Joao Serra.
Nakadetine ita da Teves ken Serra iti solar ti Ministry of the Interior, a kinadua ti maysa pay nga abogado.
Kinuna ni Topacio nga awan ti warrant of arrest wenno written authority nga impakita dagiti nangarestar kada Teves ken Serra, no ania ti gapu a maipupokda.
Adu a kaso ti nakaidaruman ni Teves, nga imbilangen ti Anti-Terrorism Council (ATC) a kas terorista, agraman iti pannakapapatay ni dati a gobernador Roel Degamo ken dagiti siam a kakaduana iti Pamplona, Negros Oriental idi Marso 4, 2023.
Marcoleta, naisublin iti pagbaludan
Idi 2024, nangipaulog ti Manila Regional Trial Court (RTC) Branch 51 iti warrant of arrest idi 2024 a maibusor ken ni Teves.
Kinanselar ti Department of Foreign Affairs (DFA) ti pasaporte ni Teves kas imbilin ti korte, a namagbalin kenkuana nga undocumented alien iti Timor-Leste.
Sakbay a napasamak ti pannakapatay ni Degamo, napan ni Teves iti Estados Unidos ket saanen a nagsubli pay. Ngem gapu iti di autorisado a panaglanganna, inikkat ti Kamara ni Teves a kas kamengna.
Nagkamang ni Teves iti Timor-Leste a nagkiddawanna iti asylum.
Apagtapog ti 2025, pinatgan ti Court of Appeals ti Timor-Leste ti apelar ni Teves a pannaka-extradite-na. (Jeffrey Damicog/Manila Bulletin//Lito Hilidon/Bannawag)
