Dinutokan ni Presidente Ferdinand Marcos Jr. ni Darlene Berberabe a kas baro a Solicitor General, a nangsukat ken ni Menardo Guevarra, bayat ti agtultuloy a pannakarepaso ti gabinetena.
Nagsapata ni Berberabe iti sango ti Presidente ita nga aldaw, Mayo 29, iti Malakanyang.
Nagturpos ni Berberabe, dekana ti University of the Philippines College of Law, a kas summa cum laude iti kurso a Philosophy manipud it UP, ken kas salutatorian iti UP Law idi 1999.
Nagpaay a kas CEO ti Pag-IBIG Fund idi panawen ni dati a presidente Benigno "Noynoy" Aquino III. Nagpaay pay a senior counsel ti Procter & Gamble Philippines.
Nabigbig a maysa kadagiti Ten Outstanding Women in Nation Service idi 2013 ken maysa kadagiti 100 Most Influential Filipino Women idi 2014.
Marcoleta, naisublin iti pagbaludan
Ti pannakadutok ni Berberabe ket paset ti nasaksaknap a pannakarepaso ti gabinete ni Presidente Marcos kalpasan ti midterm elections tapno mapasayaat ti trabaho ti gobierno.
Kas maysa a solicitor general, ni Berberabe ti mangitakder ken mangidepensa iti legal a pagtaktakderan ti gobierno iti korte.
Iti mensahe ni dati a solicitor general Guevarra, kinunana nga "addaan nangato a kalibre" ti simmukat kenkuana, ket kabaelan daytoy ti trabaho ti solicitor general. (Argyll Cyrus Geducos/Manila Bulletin//Lito Hilidon/Bannawag)
