Sipud idi napan a tawen, pito nga ambulansia ti natiliwan nga agus-usar iti EDSA Busway uray awan ti inluganda a pasiente ken awan ti papananda nga emerhensia.
Idi Hunio ti napan a tawen, inusar ti dua nga ambulansia ti EDSA Busway tapno kamakamenda ti maysa a pabuya iti maysa a mall iti Pasay City; idinto nga idi Pebrero itoy a tawen, adda manen ambulansia a nagusar iti EDSA Busway ken blinker uray awan ti inluganna a pasiente.
Segun iti Metropolitan Manila Development Authority (MMDA), dagitoy ti makaigapu a saanda a maiprograma ti automatiko a pannakailaksid dagiti lugan nga addaan iti sirena ken blinker iti system ti No-Contact Apprehension Policy (NCAP).
Kinuna ni MMDA chairperson Don Artes a rumbeng a masigurado a ti pannakausar dagitoy a lugan ket pudpudno a para iti emerhensia ta addan dagiti kaso a maabuso dagitoy.
Ti impeachment trial ti mangdalus iti naganko --Sara Duterte
Ngem kasano a maammuan ti MMDA no umisu ti pannakausar ti ambulansia ken lugan ti bombero?
Inlawlawag ni Artes a sakbay a maipatulod ti notice of violation iti akinkukua iti nairehistro a lugan, adda dagiti batido nga enforcer a nadutokan a mangtingiting no adda dagiti banag a mangikalintegan iti violation.
Iti sidong ti NCAP, amin a lugan a matiliw ti kamera ti AI-technology CCTV ket agdalan iti automatic review, kaipapananna a mano-mano a repasuen dagiti empleado ti NCAP ti violation ket no natakuatanda nga awan ti violation, saan a maipatulod ti notice of violation.
Kastoy met laeng ti maaramid iti kaso dagiti ambulansia ken lugan ti bombero, ta kinuna ni Artes a masapul nga adda panagparbeng iti panagusar kadagiti emergency vehicle. (Aaron Recuenco/Manila Bulletin//Lito Hilidon/Bannawag)
