Nayalud-od ti pannakaiparang ti articles of impeachment kontra ken ni President Sara Duterte manipud Hunio 2, nagbalin a Hunio 11, 2025.
Daytoy ti kinuna ni Senate President Francis “Chiz” Escudero tapno maikkan ti waya ti Senado a mangtaming kadagiti priority legislative measure sakbay nga agleppas ti maika-19 a Kongreso inton Hunio 14.
Idinto nga adda laengen innem nga aldaw ti sesion iti las-ud ti dua a lawas, impaganetget ni Escudero a masapul unay a maipaulog dagiti kangrunaan a paglintegan a nakapila iti lehislatura.
Segun ken ni Escudero, adda 12 a napateg a paglintegan a masapul a leppasen ti Kongreso, ta nairaman dagitoy iti napagsasaritaanda iti taripnong ti Legislative-Executive Development Advisory Council (LEDAC) idi Mayo 29.
Kinuna pay ni Escudero a masapul a tamingen ti Commission on Appointments (CA) ti 200 a presidential appointee, agraman ti tallo a sekretario ti gabinete, uppat nga opisial ti constitutional commission, 39 foreign service officers, ken 277 nga opisial ti Armed Forces of the Philippines (AFP).
Tallo a bagyo iti ruar, uneg ti PAR, bambantayan ti PAGASA
Idi damo, naikeddeng ti pannakaiparang ti Articles of Impeachment inton Hunio 2 ken agummong ti Senado a kas impeachment court inton Hunio 3. Ngem naitantan daytoy, ket nagbalin a Hunio 11. (Hannah L. Torregoza/Manila Bulletin//Lito Hilidon/Bannawag)
