Binallaagan ti Land Transportation Office (LTO) dagiti motorista a mabalin a maibaludda iti agingga iti dua a tawen no matiliwda a mangbaliw wenno mangabbong iti plaka dagiti motorsikloda kalpasan a nagkiddaw ti Metropolitan Manila Development Authority (MMDA) iti legal offensive assistance kontra iti 50 a motorista a natiliw ti kamera a nangabbong kadagiti plaka ti motorda.
Nasurok met a 5,400 a naglabsing ti natiliw iti makalawas a pannakaipatungpal ti No-Contact Apprehension Policy (NCAP) iti Metro Manila sipud idi Mayo 26, kas impalgak ti MMDA ita a Lunes, Hunio 2.
Segun iti datos ti MMDA, ti kadakkelan a NCAP violation tagging kadagiti lugan ket iti umuna nga aldaw ti pannakaipatungpal ti NCAP, nga addaan iti 1,112 a naglabsing. Bimmaba ti bilang iti 489 idi Sabado, Mayo 31, ken 565 idi Domingo, Hunio 1.
Agdagup iti 5,436 a naglabsing ti nairekord manipud Mayo 26 agingga Hunio 1, segun iti MMDA.
Aldaw ti panangsarungkar ken ni Duterte, ninayonan ti ICC
Itoy a Lunes, napan iti LTO ti pangulo ti MMDA Special Operations Group a ni Gabriel Go tapno agisubmitir kadagiti pedaso ti ebidensia kontra iti 50 a motorista a mapapati a nangabbong kadagiti plaka ti motorda.
Imballaag ti hepe ti LTO a ni Assistant Secretary Vigor D. Mendoza II nga agur-uray dagiti administrative ken criminal liabilities kadagiti aglabsing maibasar kadagiti agdama a linteg a pakairamanan ti Republic Act 11235 (Motorcycle Crime Prevention Act).
"Iningetantayon ti kampania kontra kadagitoy nga errant motorist ken karaman ditoy ti social media monitoring," kinuna ni Mendoza.
Idi napan a lawas, nangipaulog ti LTO iti show cause order kontra iti rehistrado nga akinkukua iti motorsiklo nga addaan plaka a naabbongan iti packaging tape. Namonitor ti retrato daytoy babaen ti social media monitoring team ti LTO.
Kinuna ni LTO Executive Director Greg Pua a malaksid iti ₱5,000 a multa, ti panangunas, panangbalbaliw wenno panangpeke wenno panangtulad, panangabbong wenno panangilemmeng iti mabasa a numero ti plaka ket madusa pannakabalud iti innem a bulan ken maysa nga aldaw agingga iti dua a tawen, maibatay iti RA 11235.
Malaksid iti panangidagadagna kadagiti motorista a surotenda laeng dagiti pagannurotan ti trapiko, kiniddaw pay ni Pua kadagiti netizen a dagus nga ireportda iti LTO dagiti kaso ti panangabbong kadagiti plaka. (Aaron Recuenco/MANILA BULLETIN)
