Aganay a 140 nga overseas Filipino worker (OFW) iti Nueva Vizcaya ti nakaawat iti agdagup iti ₱2.6 a milion a tulong a pinansial manipud iti Overseas Workers Welfare Administration (OWWA).
Naiwaras ti tulong babaen kadagiti nadumaduma a programa ti OWWA pakairamanan ti Balik Pinas, Balik Hanapbuhay, dagiti programa ti Education and OFW Dependents Scholarship, Skills for Employment Scholarship Program, Emergency Repatriation and Medical Assistance, ken ti Special Livelihood Program.
Indauluan ni OWWA Regional Director Virsie Tamayao ti seremonia ti distribusion, kaduana ni Dolly Rose Minas, Public Employment Service Division manager ti Provincial Government Unit.
"Manipud iti ₱5,000 agingga iti ₱20,000 dagiti naited a tulong a pinansial," kinuna ni Tamayao.
Pimmaltog iti dati a mayor iti Abra, sapsapulenen ti PNP
Innayonna a nakaawat iti ₱120,000 a death benefits ti pamilia ti maysa nga OFW a pimmusay bayat ti panagtrabahona iti ballasiw-taaw.
Impaganetget ni Tamayao a ti pannakaiwaras ti tulong ket mangipakpakita ti panagkumit ti gobierno a tumulong kadagiti OFW nga ag-reintegrate ken makabangon manipud iti narikut a kasasaad. (Ben Moses Ebreo/ALM/PIA Nueva Vizcaya)
