Pinasingkedan ni Senador Ronald Dela Rosa ita a Mierkoles, Hunio 4, a nagtaud iti opisinana ti draft resolution ti Senado a mangikalkalikagum a mangibasura iti impeachment complaint kontra ken ni Bise Presidente Sara Duterte.
Iti maysa nga interbiu, kinuna ni Dela Rosa a bukbukodna laeng nga inggannuat ti resolusion ket saan a binilin ti ania man nga external party, a pakairamanan ti bise presidente.
“Naggapu dayta iti opisinak. Initiative-ko daytoy. Awan nakaibinganna iti daytoy,” kinunana maipapan iti bise presidente.
Kidkiddawen ti draft resolution ti pannaka-dismiss ti impeachment complaint maibusor iti maikadua a kangatuan nga opisial ti pagilian, a dinakamatna a limbesen ti nasurok a 100 nga aldaw sipud naipatulod ti Articles of Impeachment iti Senado nga awan ti ania man nga a katukad nga aksion manipud iti Senado--nga ag-adjourn-ton no Hunio 14.
₱200 a nayon ti sueldo, tingitingen pay dagiti senador
Indagadag ni Dela Rosa iti publiko ken padana a mammanday-linteg a basaenda ti draft resolution, nga impaganetgetna a klaro nga ilawlawag ti linaonna ti intension daytoy.
Ti resolusion, a saan pay a pormal a naipila, ket mangikalkalikagum a mapagbalin nga awan serbina ti impeachment complaint a naipila bayat ti maika-19 a Kongreso, a nadakamat ti kaawan ti hurisdiksion ti maika-20 a Kongreso a mangsango iti daytoy.
“Maibatay kadagiti nabasak, dagiti legal nga opinion manipud kadagiti eksperto iti linteg, awanan iti hurisdiksion ti 20th Congress nga agtignay iti impeachment a naipila iti 19th Congress,” inrason ni Dela Rosa.
Kinunana pay a saan a personal a nagreport ken ni Senate President Francis Escudero maipapan iti nasao a resolusion ngem imbatadna a sumagmamano a senador, a pakairamanan da Sen. Imee Marcos ken Senate President Pro Tempore Jinggoy Estrada, ti makaammo iti daytoy ken nangtedda iti inputs.
Impalgak ni Dela Rosa nga adda di kumurang a tallo a working draft ti resolusion, nga adda dagiti input nga aggapu iti nadumaduma a senador.
Idinto a dina kayat nga ibaga ti eksakto a bilang dagiti senador a mangsupsuportar iti draft, impasimudaag ni Dela Rosa nga umad-adu dagiti mangsuportar.
Iti pannakasursurat daytoy a damag, sitatalinaed pay laeng a draft ti porma ti resolusion, a segun ken ni Dela Rosa, manamnama ti final inputs manipud kadagiti dadduma a senador. Kinuna ni Dela Rosa a mabalin nga ipilana ti resolusion iti sumaruno a lawas.
Imbatad metten ni Escudero nga awan ti pormal a naipila wenno nakasagana a resolusion iti Senado, ken inwaksina dagiti maiwarwaras a kopia kas “scraps laeng ti papel.” Manamnama nga ag-reconvene ti Senado a kas impeachment court inton Hunio 11, no awan ti manglapped nga ania man a procedural moves a mabalin a mangitantan wenno mangwaswas iti trial. (Dhel Nazario/MB)
