AGLATLATAK ita ti Enrique’s Great Mulberry Farm iti Brgy. 39, Pasiocan, Bacarra, Ilocos Norte. Adu ti mapmapan agpaspasiar sadiay. Opisial a nanglukat daytoy iti publiko idi Pebrero 15, 2025.

Naitampoken iti daytoy a benneg ti Bannawag (Oktubre 1-15, 2024) daytoy a farm. Ita, nalataken daytoy a plantasion ti mulberry wenno amoras. Kinapudnona, Grand Champion iti Food Category iti naangay nga Adal ken Sirmata Mentoring Program for the Best Business Concept 2024 iti Ilocos Norte. Ni Mrs. Mary Grace Lamug ti nangilaban.

Iti opisial a pannakalukat ti Enrique’s Great Mulberry Farm iti publiko, maysa kadagiti bimmisita ni Charmaine R. Raquel, maysa a nalatak ken nalaing a vlogger a naipablaak met laeng iti Bannawag ti pakasaritaanna. Babaen iti vlog ni Charmaine a Charmification TV iti YouTube ken Facebook, nayam-ammo iti sibubukel a lubong ti social media ti nasao a farm. Ket ad-adda nga immadu dagiti immay pimmasiar iti farm.

Sumagmamano kadagiti ubbing a simmarungkar ken nagpuros iti mulberry iti farm.

Ania ngamin ti maganab iti ipapasiar iti farm? Malaksid a malinglingayka, mabalin a maikkanka pay iti kapanunotan para iti maysa a nayon a panguartaan wenno negosio.

Kolum

APO ABOGADO (29): Pannakaikkat ti Empleado Gapu iti Pannakalugi ti Kompania

Ididiaya ti Enrique’s Great Mulberry Farm kadagiti bumisita ti sistema a pick and pay. Agbayad ti tunggal bisita iti sangagasut a pisos ket maikkanda iti maysa a picking tub a punuenda iti maburasda a bunga ti mulberry. Maikkanda pay iti guantes nga usarenda tapno saan a mamansaan ti imada iti panagpurosda. Mabalinda met ti mangan kabayatan ti panagpurosda.

Malaksid iti pannakaay-ayo nga agpuros dagiti bimmisitan iti farm, adu kadakuada ti naguyugoy ken nainspiraran nga agmula iti mulberry uray iti arubayanda laeng. Naggatangda kadagiti seedling. Wen, adda nakasagana a magatang iti nasao a farm.

Ibalbalakad dagiti mangimatmaton iti Enrique’s Great Mulberry Farm kadagiti naggatang iti seedling a masapul nga imulada dagitoy iti nainit a lugar ken sibuganda iti inaldaw. Uray no dadakkelen dagitoy, masapul a mapasayakan tapno napimpintas ken natubtubbog dagiti bungada.

Saan a palubosan dagiti mangimatmaton iti Enrique’s Great Mulberry Farm a tumayag unay dagiti mulada a mulberry tapno magaw-at dagiti bumisita nga ubbing dagiti bunga dagitoy. Ta daytoy a padas, saandanto pulos a malipatan. Maikkanda pay iti pagpampanunotan a masapul ti disiplina iti ania man nga aramidenda. Ngamin, iti panagpurosda, maipaganetget a dagiti laeng nangisit ti purosenda ta dagitoy ti naluom. Saanda a mapalubosan a pagang-angawanda a purosen dagiti nalabbaga ken berde a bunga sa kalpasanna, ibatobatoda laeng.

Da Rosario R. Lamug ken Mario T. Tejada (mannurat ti Bannawag) ti Piddig, Ilocos Norte a bimmisita met iti farm.

Malaksid iti bunga ken seedling, agar-aramid ken aglako pay ti Enrique’s Great Mulberry Farm iti mulberry jam ken mulberry concentrated juice.

Adu ti mayat a mangan iti bunga ti mulberry gapu ta, segun kadagiti panagadal,  makatulong daytoy kadagiti addaan iti nangato a cholesterol ken sakit ti puso.  Malaksid iti dayta, mapapigsana pay ti immune system, mapababana ti risgo iti sakit a kanser, matipedna ti panagperdi wenno panagrukop ti tultulang, mapapintasna ti digestion ken matipedna ti panagngato ti blood sugar.

Maibilang kadagiti bimmisitan iti farm dagiti opisial ti Department of Tourism ti Rehion 1 a da Chief Tourism Operations Officer Gay Nora Marie Acacio-Gapas, Tourism Operations Officer II Divine Dulay, Tourism Operations Assistant Allan Villanueva, ken Bacarra, Ilocos Norte Tourism Officer Dina Afaga. Nasangaili metten ti farm dagiti pannakabagi ti Provincial Government of Ilocos Norte (PGIN), Micro Small and Medium Enterprise Office ti Laoag City, Mariano Marcos State University, Trixie Ablan Tour Guiding Services, Masagana Eco Farm, ken dagiti lokal a turista ken dagiti naggapu iti ballasiw-taaw, Manila ken kabangibang a probinsia.

Maysa a pamilia a nagpuros iti mulberry.

Babaen ti panangawis dagiti tourism officer ti Department of Tourism ti Rehion I ken ti ili a Bacarra, bimmisita met itay napalabas nga Abril 1, 2025 dagiti national ken local social media influencer, celebrity chef, local travel and tour operator, media, cultural worker, ken ti Department of Trade Central Office Market and Product Development and Branding Office Staff.

Naragsakda a nagpuros iti bunga ti mulberry.

Sapay la koma ta agtultuloy ti idudur-as daytoy a farm tapno makatulong kadagiti adda sagubanitna ken mapasantak, mapabaknang ti turismo iti probinsia ken iti pagilian.—O