Iti baet ti kumarkaro a panangriribuk iti kinatalged nga aramid ti China iti West Philippine Sea (WPS), nagkumit ti Filipinas ken ti Estados Unidos (US) iti naan-anay a singgalut iti depensada ken mangsapul iti napabaro a pannakikadua kadagiti kaaliadoda iti rehion.
Nagsarita da United States Secretary of State Marco Rubio ken Sekretario ti Department of Foreign Affairs (DFA) Enrique Manalo idi Hunio 9.
Impaganetget dagit dua nga opisial ti napateg nga akem ti aliansa ti Filipinas ken US iti panagtalinaed iti siwawaya ken silulukat nga Indo-Pacific region.
Dinakamatda met ti positibo a panagrang-ay, kas iti Joint Vision Statement of the Philippine and US Defense Secretaries iti panangipasdek iti panagtinnulong iti industria ti depensa, ti indiaya ti US a panangilako iti alikamen ti militar iti Filipinas, ken ti pannakaisayangkat ti Balikatan exercises.
Luistro: Mabalin a luktan manen ti Senado ti impeachment ni VP Duterte no paboran ti SC ti MR ti Kamara
Iti laksid ti “America First” policy ni US President Donald Trump, impaganetgetna ti panagkumitna iti aliansa iti depensa iti Filipinas bayat ti panagtultuloy a panangrirriribuk ti China iti SCS.
Malaksid ken ni Rubio, kapatang pay ni Manalo ni United Nations Secretary-General Antonio Guterres ken Permanent Representative of the Philippines to the UN in New York Antonio Lagdameo. (Raymund Antonio/Manila Bulletin//Lito Hilidon/Bannawag)
