Babaen ti 18-5 a botos, insubli ti Senado, a nakatugaw a kas maysa nga impeachment court, idi rabii ti Martes, Hunio 10, dagiti articles of impeachment kontra ken ni Bise Presidente Sara Duterte iti Kamara.
Nupay insublida, saan ketdi a naminpinsan a na-dissmis ti impeachment case ket mabalin pay laeng daytoy a tamingen ti Senado, a kas maysa nga impeachment court.
Ti mosion ti pannakaisubli, nga ingganetget ni Senator-judge Alan Peter Cayetano, ket naidatag a kas kompromiso tapno mataginayon ti konstitusional nga integridad a saan a masapa a mapasardeng ti kaso.
Silalawag a naibatad iti mosion a ti pannakaisubli dagiti artikulo ti impeachment ket saanna a kayat a sawen a na-dismiss wenno pinalen a nakedngan daytoy.
Lima a senator-judges ti nagbotos kontra iti mosion, da Senate Minority Leader Aquilino Pimentel III, Sen. Risa Hontiveros, Sen. Nancy Binay, Sen. Grace Poe, ken Sen. Sherwin Gatchalian.
Dati a sekretario ti DILG Sarmiento, nadutokan a baro nga adviser ti OPAPRU
Iti panangsupiatna iti mosion, binabalaw ni Sen. Hontiveros ti naaramat a pananangisao iti mosion a kas saan a nalawag ken legal a problematiko.
"Awan ti remand wenno return iti Konstitusion. Ti obligasiontayo ket mangusig ken mangeddeng," kinunana.
Inyunay-unayna a no kasapulan dagiti panangilawlawag, mabalin koma a kiniddaw ti Senado iti House prosecution panel a mangipila iti pormal a panagtungpal imbes nga isublida ti kaso. (Wilnard Bacelonia/PNA)
