Umawat ti Santa Monica Parish Church ti Sarrat, Ilocos Norte, iti ₱40 a milion a pondo manipud iti gobierno para iti umuna a paset ti pannakatarimaan ti simbaan, segun iti Catholic Bishops’ Conference of the Philippines (CBCP) itay Hunio 11.
Maisayangkat ti "restoration" ti siniglo ti tawennan a simbaan gapu iti pannakadadaelna a gapu kadagiti ginggined idi Pebrero, Hunio, ken Disiembre iti 2024.
Nabukel ti restoration agreement ti Diocese of Laoag nga imbagian ni Bishop Renato Mayugba ken ti National Historical Commission of the Philippines (NHCP) nga imbagian ni NHCP Chair Regalado Trota José.
Segun iti katulagan, ti NHCP ti mangimaton iti restoration, babaen ti pammalubos ti Diocese of Laoag.
Kaunaan a solar farm iti Cagayan, mabiiten a mapagandar
Madama ti bidding kadagiti contractor ken agtrabaho iti pannakatarimaan ti simbaan a marugian itoy a Septiembre.
Ti Santa Monica Church ti mabigbig a maysa kadagiti kaatiddogan ken kalawaan a Filipino-Hispanic a simbaan iti Ilocos region, a mapattapatta a 200 ti tawenna. (Ellalyn De Vera-Ruiz/Manila Bulletin//Lito Hilidon/Bannawag)
