Inarestar dagiti kameng ti Criminal Investigation and Detection Group (CIDG) iti Opol, Misamis Oriental ti maysa a lalaki a taga-South Korea idi Hunio 13.
Segun iti officer-in-charge ti CIDG a ni Brig. Gen. Rolindo Suguilon, naarestar ni “Jang,” 53, gapu iti Red Notice nga impaulog ti International Criminal Police Organization (Interpol) gapu iti panaglabsingna iti Articles 3 ken 11 (Fraud) of the Punishment of Tax Offenses Act ti South Korea.
Kinuna ni Suguilon a nayawaten ti naarestar a ganggannaet iti Bureau of Immigration a manamnama a mangisayangkat iti pannakadeportar daytoy.
Kinuna ti opisial a ti pannakakemmeg ni "Jang" ti mangipakita a saan a mabalin a pagkamangan dagiti pugante ti pagilian.
Inggunamgunamna ti kinapateg ti panagtinnulong dagiti ahensia ti gobierno iti pannakakemmeg dagiti tattao a "wanted" iti pagilian. (Aaron Recuenco/Manila Bulletin//Lito Hilidon/Bannawag)
