Sangapulo ket lima a pakete ti mapapati a shabu ti naduktalan iti baybay iti nagbaetan ti Babuyan Island ken Gonzaga, Cagayan idi Martes, Hunio 17.
Naala dagiti polis ti kontrabando a nadiskobre ti maysa a mangngalap.
Agdagsen iti 1 a kilo ti tunggal pakete, wenno 15 a kilo amin, ken addaan balor a ₱102 a milion.
Naala pay iti dayta met laeng nga aldaw dagiti pakete ti mapapati a shabu iti baybay iti nagbaetan ti Camiguin Island ken Cape Engaño, Barangay San Vicente, Santa Ana.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Namarkaan dagitoy iti numero a 66 nga addaan kadagiti karakter nga Insik ken marka a Freeso-dried Durien.
Kinuna ni Cagayan police director PCol. Mardito G. Anguluan a maipan dagitoy iti Philippine Drug Enforcement Agency-Region 2 para iti evaluation ken dokumentasion.
Binigbig dagiti polis ti Project SPIES (Strengthening Port Interdiction to Enhance Security), a mangmonmonitor iti illegal a droga iti probinsia, a kas nakaduktal kadagiti kontrabando
“Ti naballigi a pannakaala kadagitoy a mapapati a shabu ket resulta ti natibker a panagtitinnulong dagiti mangngalap ken dagiti lokal nga opisial. Babaen iti Project SPIES, agkaykaysakami a mangpasardeng iti panagsaknap daytoy nga illegal a droga iti probinsia,” kinuna ni Anguluan.
Inreport ti PDEA-Region 2 a naduktalan iti Cagayan dagiti agtatapaw a mapapati a shabu nga aggatad iti ₱323 million iti napalabas nga aldaw, Hunio 13, iti Sitio Narvacan, Barangay Dilam, Calayan, maysa a pakete a nakurang a 1 kilo nga aggatad iti ₱5.7 a milion; Barangay Centro 6, Claveria, Hunio 15, dua a sako nga addaan marka a "Daguanyi" ken Chinese characters ken maysa a galon ti di pay nabigbig a likido nga aggatad iti ₱312 million; ken iti Sitio Mingay, Barangay San Juan, Santa Praxedes idi Hunio 15, 750 a gramo nga aggatad iti ₱5.1 a milion, a naikabil iti garbage bag. (Liezle Basa Iñigo, Freddie Lazaro/MANILA BULLETIN)
