Itantandudo ti ili ti Nueva Era, Ilocos Norte, a kaaduanna nga indigenous people (IP) a a Tingguian dagiti agnanaed, ti edukasion a kas wagas tapno mapreserbar ti tawid ken maisagana ti ub-ubing a henerasion para iti masakbayan.
Iti babaen ti programa a "One Professional, One Family," panggep ti nadumaduma a support services ti gobierno ti maaddaan iti uray maysa laeng nga empleado a propesional nga aggapu iti kada pamilia wenno sangakabbalayan.
Tunggal panaglukat ti klase, saanen a pakadanagan dagiti nagannak ti gumatang iti school supplies para kadagiti annakda ta ipaay ti gobierno munisipal ti Nueva Era dagiti nasken a kasapulanda.
“Nairamut daytoy nga inisiatiba iti adbokasiatayo a maaddaan iti uray maysa laeng a propesional iti tunggal pamilia,” kinuna ni Mayor Aldrin Garvida iti maysa nga interbiu.
Manipud idi 2022, in-institutionalize ti munisipio ti pannakailatang ti multi-million-peso funding para iti pannakaipaay ti educational assistance ken incentives kadagiti iskolar ti Nueva Era nga agpalista manipud Grade 11 ken 12 ken agingga iti tertiary level.
SANTALENTADO 2026: Beat the Risk, isayangkat ti LGU Santa
Maibasar iti Municipal Ordinance No. 2022-52, maikkan dagiti iskolar manipud iti 11 a komunidad ti ili iti di kumurang a ₱2,500 nga educational assistance iti kada tawen para iti senior high school ken stipend manipud ₱3,500 agingga iti ₱4,000 kada semestre para kadagiti estudiante iti kolehio.
Umawat met dagiti academic achiever iti cash incentives no agturposda iti top of the class, kas iti ₱5,000 para iti cum laude, ₱10,000 para iti magna cum laude ken ₱15,000 para iti summa cum laude.
Ibaklay met ti munisipio dagiti libre a serbisio ti transportasion ken bayad ti abang iti dormitorio para kadagiti estudiante manipud iti ruar ti ili, a kaaduanna nga agad-adal kadagiti siudad ti Batac ken Laoag.
Segun ken ni Garvida, maysa kadagiti kangrunaan a rason a saan a makaturpos iti kolehio ti adu nga IP nga estudiante ket ti kaadayoda kadagiti eskuelaan, agraman dagiti parikut iti transportasion ken pagyanan a boarding house.
“Nagasatkami unay ditoy Nueva Era ta edukasion ti prioridad,” kinuna ti residente a ni Agnes Parado.
Agarup 63 kilometro manipud Laoag ken agarup 25 kilometro manipud Batac babaen ti kalsada a Batac-Banna, maysa a karit ti transportasion a publiko ti Nueva Era gapu iti lokasionna iti sakaanan ti maysa a bantay.
Addaan 3,300 a sangakabbalayan ti Nueva Era segun iti datos manipud iti Municipal Social Welfare and Development Office.
Para ken ni Cheryll Tabangay, maysa a Tingguian manipud Nueva Era ken kaunaan nga Indigenous People Mandatory Representative ti Ilocos Norte, agtultuloy ti dakkel a paset ti programa iti panangtulong kadagiti IP iti panagadalda.
"Dakkel a tulong ti programa kadakami. Panggepna ti mangipaay iti patas a pannakagun-od iti de kalidad nga edukasion ken mangitandudo iti biag dagiti pamilia, partikular ti marginalized sector,” kinunana. (Leilanie Adriano/PNA)
