Binilin ti Office of the Ombudsman (OMB) ni Bise Presidente Sara Duterte ken siam pay nga opisial ti Office of the Vice President (OVP) ken ti Department of Education (DepEd) a sungbatanda ti naipila a kaso a kriminal kontra kadakuada mainaig iti mapapati a di umisu a pannakausar ti confidential funds.
Impaulog ti OMB ti pammilin idi Hunio 19 babaen ti special panel of investigators.
Malaksid ken ni Duterte, nairaman a naidarum dagiti opisial ti DepEd a da Edward D. Fajarda ken Gina F. Acosta (Special Disbursing Officers); Director for Strategic Management Office ken Assistant Secretary Atty. Sunshine Charry A. Fajarda; Undersecretary for Administration Ret. Maj. Gen. Nolasco A. Mempin; ken Undersecretary for Finance Service Analyn M. Sevilla.
Para iti OVP, nabilin a sumungbat da Chief of Staff Atty. Zuleika Lopez, Assistant Secretary and Assistant Chief of Staff Lemuel Ortonio, ken da Lt. Col. Dennis Nolasco ken Col. Raymund Dante P. Lachica ti Vice President Security and Protection Group.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Naibilin nga idatagda dagiti counter affidavit-da maibatay iti Committee Report No. 1503 ti Kamara, idi Hunio 10, 2025, mainaig kadagiti naireport nga anomalia iti pannanakausar ti confidential fund ni Duterte para it OVP ken DepEd.
Iti Committee Report No. 1503, naakusaran ni Duterte ken dagiti kakaduana iti technical malversation, falsification and use of falsified documents, perjury, bribery, corruption of public officers, plunder, betrayal of public trust, ken culpable violation of the Constitution.
Masapul nga maidatagda dagiti counter-affidavit iti las-ud ti 10 nga aldaw manipud iti pannakaawatda iti pammilin ti OMB, ngem saanda awaten ti motion to dismiss wenno panagkiddaw iti bill of particulars. (Czarina Nicole Ong Ki/Manila Bulletin//Lito Hilidon/Bannawag)
