NO paglakuan iti diket a mais ti pagsasaritaan, mabalin a saan unay a problema daytoyen gapu ta naruay dagiti agar-aramid iti cornick wenno chichacorn iti Kailokuan. Ngarud, napintas no agmulatayo iti diket a mais a para kadagiti agar-aramid iti cornick.
Adda uppat a barayti ti mais a napataud dagiti agsuksukisok iti Mariano Marcos State University (MMSU) a buklen ti grupo da Mario I. Remolacio, Constante B. Julian, Martina F. Tinguil, Federico R. Pascual, ken Corazon A. Sabuco.
Nairehistro dagitoy a barayti iti National Seed Industry Council (NSIC) ken mairekomendar a para chichacorn wenno cornick. Segun kadagiti nagsukisok, addaan dagitoy iti napintas a kababalin, naandur kontra kadagiti agdadael a peste a kas iti corn borer ken corn earworm, kasta met a natibker dagitoy kontra iti angin. Kadawyan a matangkenan dagitoy manipud 95 agingga iti 105 nga aldaw kalpasan ti panagtuboda.
Dagiti uppat a barayti ti mais: MMSU Glut 1, MMSU Glut 3, ken MMSU BMIR Glut 1. Agpapada dagitoy a mairekomendar a maimula iti Luzon idinto a rekomendado met ti MMSU Glut 2 iti Visayas.
DAGITI VLOGGER ITI AMIANAN 15: Intayon Makiwatwat Idiay Bagulin!
Maibatay iti naisayangkat a panagsukisok, mabalin a makaapit dagiti taga-Luzon iti 6.89 agingga iti 8.13 tonelada iti tunggal ektaria, idinto a mabalin met a makaapit iti agarup 5.33 agingga iti 6.66 tonelada iti tunggal ektaria iti Kabisayaan.
Segun pay kadagiti nagsukisok, mabalin nga imula dagitoy iti wet season (panagtutudo), nupay napimpintas nga amang ti apit no maimula dagitoy iti dry season (kalgaw). Naipadas dagitoy babaen ti pannakasurot ti napasayaat a sistema ti panagmula iti mais.
No agmulaka kadagitoy a barayti, makatulongka iti pannakasustener ti kasapulan dagiti agar-aramid iti cornick. Kasta met a maaddaanka iti nayon a pamastrekan.
Kadagiti interesado a mangipadas kadagitoy a barayti, mabalinyo ti bumisita iti MMSU wenno agsurat iti Presidente ti MMSU, ni Dr. Virgilio Julius P. Manzano, Jr.—O
