Kagiddan ti pannakaiselebrar ti maika-84 a panagkasangay ni sigud a gobernador ti Ilocos Sur Luis “Chavit” Singson, mainaguraran ti CHAVIT Coliseum iti Ilocos Sur Farmers Cultural and Economic Development Complex iti Siudad ti Vigan ita a Hunio 21, 2025, a pakaangayan ti panagsapata dagiti nangabak nga opisial ti probinsia nga agtakem iti 2025-2028, iti panangidaulo ni nailayon a Gobernador Jeremias “Jerry” Singson. Daytoy ti umuna a pasken a mapasamak itoy a kabarbaro a pasdek.
Kinuna ni Gobernador Chavit Singson a makaakomodar ti CHAVIT Coliseum iti agingga iti 9,000 seating capacity ket ditoyton ti pakaangayan dagiti dadakkel a taripnong, religious events, national ken regional sports events, kasta metten dagiti dadakkel nga sporting events kas iti PBA out-of-town ken all-star games.
“Agbalin daytoy a nayon a pamastrekan ti probinsia ta malaksid a mapaupaan ti coliseum, dandani pay malpasen ti One Ilocos Sur Hotel a mabangbangon iti asideg daytoy. Adda pay dagiti stalls ditoy a nairanta a pagyanan dagiti kaprobinsiaan nga aglako tunggal adda event tapno isu pay a nayon ti pamastrekanda,” innayonna.
Kas pangbusat, naawis ti uppat a team manipud iti Philippine Volleyball League (PVL) nga agay-ayam iti dua nga aldaw. Libre ti ticket a naiwaras para kadagiti taga-Ilocos Sur a mapan mangbuya kadagiti paboritoda nga umaayam kas sagut ti gobierno probinsial.
Nabotosan, baro nga opisial ti Ilocos Sur Provincial Capitol Press Corps
Mabuya inton Hunio 22, 2025 iti alas kuatro iti malem ti laban ti Akari Chargers kontra iti Cignal HD Spikers. Ti met Capital 1 Solar Spikers ken Creamline Cool Smashers ti agsalisal iti alas 6:30.
Inton Hunio 23, 2025, iti alas kuatro iti malem, agbalubal met ti Cignal HD Spikers ken Capital 1 Solar Spikers idinto nga agsango met ti Creamline Cool Smashers ken Akari Chargers iti alas 6:30. (Mancielito S. Tacadena)
