Idatag ni outgoing Senator Aquilino “Koko” Pimentel III iti Korte Suprema ti pangngeddeng ti Commission on Elections (Comelec) a nangipalubos iti pannakaiproklamar ni Marcelino “Marcy” Teodoro a kas diputado ti 1st District ti Marikina City ken nangisubli iti Certificate of Candidacy (COC) daytoy.
Binalusingsing ti Comelec en banc ti pangngeddeng ti First Division a nangwaswas iti COC ni Teodoro ken iti pannakasuspenso ti proklamasionna.
Kinuna ni Pimentel ita nga aldaw, Hunio 26, nga adda naidumduma nga inaramid dagiti kameng ti Comelec iti kaso a linutoda iti innem a bulan, ngem ikamangna daytoy iti Korte Suprema (SC).
Kinuestionar ni Pimentel no mabalin nga agkandidato iti Mayo 2025 ti maysa a pimmanaw iti distrito idi Pebrero 2024 sa nagsubli met laeng idi Septiembre 2024.
₱800 a nayon iti binulan a sueldo dagiti katulongan iti NCR, marugian inton Pebrero 7
Binabalaw ni Pimentel ti Comelec iti pannakabalusingsing ti pangngedeng ti First Division, ta maysa a daytoy a pananglabsing iti Konstitusion ken demokratiko a proseso.
Segun ken ni Pimentel, nalawag ti ibagbaga ti Article VI, Section 6 ti 1987 Constitution a ti kandidato para iti diputado iti maysa a distrito ket masapul a residente iti distrito a pagakmanna iti di nababbaba ngem iti maysa a tawen sakbay ti panagbobotos. (Dhel Nazario/Manila Bulletin//Lito Hilidon/Bannawag)
