Dinillaw ti pannakangiwat ti House prosecution panel a ni Atty. Antonio Bucoy a kas awan kapay-anna ti kunkuna ni Bise Presidente Sara Duterte a gapu ta awan met kasuratan wenno kontrata, awan met ngarud ti kaeskan ti maysa kadagiti rason ti impeachment kenkuana, partikular ti bilin a panangpapatay ken ni Presidente Marcos ken dadduma pay a nangangato nga opisial.
"Ammoyo, saan met a masapul nga isurat pay ti panagkontrata iti mammapatay. Di kadi? Saanmon nga isurat ti 'umanamongak nga agpapatay.' Awan ti kasta, ta illegal dayta," kinuna ni Bucoy iti maysa a press conference idi Biernes, Hunio 28.
“Ania a kontrata ti taltalanggutangentayo? Naisurat a kontrata, nakanotario? Adu la amin,” innayon ni Bucoy.
Nakalanad iti Artikulo 1 ti pito nga artikulo ti impeachment a naipila kontra ken ni Duterte, ti Conspiracy to assassinate President Marcos, First Lady Liza Araneta-Marcos, and Speaker Martin Romualdez.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Iti answer ad cautelam ni Duterte iti impeachment complaint, kinuna ti bise presidente nga awan ti naisurat a kontrata a mangsuportar iti naibaga a plinanona ti pannakapapatay dagiti tallo nga opisial.
Malagip a nagbalin a paulo dagiti damdamag ni Duterte idi kinunana, iti maysa a nakarekord nga interbiu, a nangtangdan iti maysa a mammapatay tapno papatayenna da Marcos ken dagiti dadduma pay. Inyunay-unayna pay a saan nga ang-angaw daytoy nga imbagana.
Idi agangay, impapilit ni Duterte nga angawna laeng dagiti imbatadna, ngem inulitna dagitoy iti sabali pay a panagparangna iti media.
"Isu met la a mismo ti nagkuna, ‘Nangkontrataak iti maysa nga assassin, iti maysa a mammapatay iti tao.’ Saan a naggapu dayta kadakami, naggapu kenkuana dayta. Ket inulit-ulitna pay ketdi, saan kadi? Iti sabali nga interbiu, inulitna dayta," kinuna pay ni Bucoy.
Kinuestionar ni Bucoy ti lohika iti likudan ti panangikalikagum iti pammaneknek ti naisurat a katulagan para iti nabatad a maiparit nga aramid. Kinunana a dagiti kakasta a waragawag ni Duterte a mismo ket mangbukel iti admission against interest. (Ellson Quismorio/MANILA BULLETIN)
