ITI YAADANIN ti init iti lelennekan ti Magna iti laud ti West Valley City, sumlep ti salemsem iti barukong ‘toy numo. Spring manen ket mangrugi koman nga agsabong, agsulbod ken agrangpapya, ken agparang dagiti nadumaduma a maris dagiti kasla adda nakemna a mulmula iti aglawlaw, ngem matubeng sa man ta kasla di pay nauma ti Apo a mangibukbukbok iti isno a kuna ti historia ti Utah a daytoyen ti kakaruan. Saanen a kas kadagiti napalabas a bulan ti winter ngem pagamuan pay laeng ta aggabur ti isno. Nangrugi payen nga agrunaw dagiti binambantay nga isno iti aglawlaw, ket dayta a panagrunaw mangparnuay iti narungsot a layus a kas iti daydi Karayan Parsua a nagramut iti daydi Kimmandela. Naimbag ta di mabannog dagiti tao nga agikabil iti sinupot a darat iti igid dagiti dadakkel a kalsada a saripda ti sumrek ti arigna agdalluyon a danum iti kabalbalayan tapno saanen a mapasarutsotan dagiti limmabas a didigra.
Iti panagsublisubli dagiti laglagip, immapay dagiti pasamak a kas iti panangrugi ni Jojo iti doktoradona iti University of Phoenix iti Utah. Dina la nakun-os ta nagsakit ket nagikkat iti nasayaat a trabahona, a nangipastrekanna ken ni Nathan a lakay ni Chichi. Maysa pay, inlakona daydi balayna ditoy West Valley ket gimmatang iti sabali idiay Ogden a nangpadakkelanda kadagiti tallo a tiltillayon nga annakda ken ni Marcella. Dakkel-bassit ti napagketna iti naglakuanna.
Peter La. Julian, 87, mannurat ti Bannawag, pimmusay
Makitayo ti nangus-usarak iti daytoy graduation ring iti Master in Literature, iti UP Diliman? Ha-ha, piman!
Iti panagsubli dagita maregmeg ti napalabas, ipalagipda met ti asidegen a panagtunged ti walo a dekada a panagdaldaliasat ‘toy numo. Nabannogen a manglaglagip ket kayatnan a gibusan. Ngem adda pay nabati a napateg unay. Ibagbagak laeng tapno adda pagbatayan a mangwanawan iti aglawlaw, iti naggapuan ken iti pagturongan; tapno saan a mayaw-awan.
Adda no kuan umagibas a ngatangata iti mugingko. Masansanen nga agkabsiw ti lagipko iti nagnagan dagidi tattao a nakawinwinnidawidko. Napapategda, isu ngarud a kayatko a lagipen ida, ngem kakaasiak metten a manglaglagip iti nagnaganda. Nupay kasta, ilanadko lattan dagiti banag a pakalaglagipak kadakuada; kasta met kadagiti tallo nga agkakaarruba a pasdek a nagpaayan ‘toy numo.
Agkakaaruba dagiti tallo a dadakkel a pasdek ti Simbaan. Ti Church Distribution Center a yan ti International Shipping Department, adda iti abagatan ti Humanitarian Center (HC) a mangtantan-aw iti Deseret Book Distribution Center (DB) iti ballasiw ti rangtay iti laud.
Nagaplikarak idiay DB, iti ballasiw ti rangtay. Idiay Downtown Salt Lake ti yan ti main office-na iti abagatan a sikigan ti Temple Square. Adu ti sanga ti DB iti Utah. Adda pay sangana dita Valley Fair. Ti DB ti agim-imprinta kadagiti naespirituan a libro ken manual dagiti mannurat a miembro, kangrunaanna dagiti libro dagiti General Authorities. Saan la a dagiti libro ti DB ti iwarwarasda; tumultulongda pay nga agiwaras kadagiti libro ken manual nga imprinta ti Church Distribution Center.
Malaksid iti libro, agiwarsda pay iti cassette tapes, e-books, framed art, pigurin, ken uray ania a banag nga adda man pakainaiganna iti pammati wenno awan. Adda pay Deseret News nga aginaldaw a pagiwarnakda. No dika pay nakapagpasiar iti maysa kadagiti pagtagilakuan ti DB, padasem.
Iti maikadua a kadsaaran ti Deseret Book Warehouse ti nagaplikarak. Idiay ti opisina ti bodega. Idi damo, nagduaduaak no awatendak ta empleadoakon iti Church Distribution Center. Miembro amin dagiti empleado ti DC idinto nga adu ti saan a miembro iti DB, isu nga inawatdak.
Adda iti sirok ti opisina ti pagrikrikusan ti belt conveyor a paguyasan dagiti bin a nakaikargaan dagiti naakas nga order manipud kadagiti natatayag a rack beam a yan dagiti paleta. Nakakartonda. Adda pallet jack a pagbunag dagiti picker kadagiti order manipud kadagiti natatayag a rack beam iti bodega. Denumero amin ti puesto dagiti paleta.
Idi mabaybayag, impadakkelda ti bodega. Nangaramidda iti at-atiddog ken ad-adu a belt conveyor. Idi kuan adda innayonda a dua a walking beam conveyor. Natatayag dagidi a kombeyor a mismon a makina nga adda la pis-item a buton ket isun ti mangsapul iti order ti agur-uray picker. Ikargana iti bin nga ipakuyasna iti belt conveyor a yan dagiti agur-uray a material handler a mangikabil iti bin a pakaurnongan dagiti order ti maysa a tao. Sa maiturong iti sabali a belt conveyor a pagur-urayan dagiti packer, sadanto met iturong iti shipping department a pagur-urayan dagiti agipaleta. Dita ti pagur-urayan dagiti shippers a mangurnos kadagiti order. No napunnon ti paleta, mangisaganada manen iti sabali a paleta. Kalpasanna bunagenda babaen ti pallet jack nga ipan iti yan dagiti trak nga agur-uray a mangibunag. Dita ti kadagsenan a trabaho. Naimbag ta saanak a pulos naibatang iti shipping. Napadasak ketdi ti nag-packing. Ken nagsangal iti karton a pakaikargaan dagiti order.
Maysaak kadagiti Material Handler nga agurnos kadagiti order a siak met la a mismon ti mapan agsapul iti sirok ti rack beam nga insaganan dagiti bodegero. Naibatangak iti order processing section iti akindaya a ligason ti bodega. Sisiak ti lalaki iti grupomi nga innem malaksid daydi 'bisormi a bangkawas a Puraw, a puraw pati ti ulona; ngem diak ammo no asino ti laklakay kadakami. Dua ti Mehikana, maikadua daydi Margarita Sanchez a para dalus ti kasilila ngem umay tumultulong no nakadalusen. Daydi la Margarita ti malagipko ti naganna ta napasig kaniak. Puraw dagidi dadduma, a pakairamanan daydi April a nasapa a nangulila iti liman sa pay la ti tawenna nga anakna.
Iti akinlaud a ligason ti bodega ti yan ti dakdakkel a grupo, ken ad-adu ti lallaki. No magaburanda iti order, agpatulongda kadakami.
Kas iti yanmi iti order processing, i-check-da met ti linaon dagiti bin a naggapu iti picking area. Computerized amin dagiti makina.
Nalaglag-an ti aramidmi iti order processing.
Ag-check in-kami iti computer. Kitaenmi dagiti nakalista iti order. Mapanmi ibunag dagiti material iti bodega babaen ti pallet jack. I-sort-mi. No matiempuam ti dadakkel nga order, no dadduma dua, wenno ad-adu pay a paleta ket maymaysa a title ti libro ti laonna ken maymaysa ti papananna, nadardaras no kua. Ngem kaaduanna nga agduduma ti laon ti maysa a paleta; saggaysaem met nga i-check iti computer. Ikabilmo iti conveyor a mangipan iti packing area a pagur-urayan ti naibatang a mangkita iti mainayon iti adda iti rack.
Saanak a narigatan iti daydi a trabahok. Nagustuak ketdi. Mangrugiak iti alas sais, sa agawidak iti alas onse. Nasayaat dagidi kakaduak. Nagustuandak daydi babai a Puraw a lead—malagipko ta agrekreklamo iti sakitna a soriasis, a napasaran met ni Samar. Imbagana a lifetime kano daydiay a sakit. Naimbag ta adda daydi sapsapo nga inreseta ti doktor ni Samar a nakaagas kenkuana. Nagustuannak met daydi Bob Johnson a bisormi. Malagipko ta diabetiko met ket imbagana kaniak iti naminsan a panagpatpatangmi a naragsak kanon no bumaba iti 150 ti lebel ti AIC-na.
Maysa laeng ti parikut. Sumsumrekka pay la iti ridaw ti Warehouse, mangngegmon ti karatakat dagiti dadakkel a belt conveyor a sa la agsardeng no panagaawidanen iti tengnga ti rabii wenno no mapunnon ti conveyor iti bin ta di magabenan dagiti sorter iti kaadu ti order. Diak ninamnama ti maaddaan iti tinnitus. Ti agwengweng a lapayag. Am-amkek ita, amangan no siak ti mangtawid iti tutuleng daydi lelang Simona a nanang daydi tatang. Pigsaam ti agsao tapno mangngegnaka.
Kunak a nasinged kaniak daydi Margarita Sanchez ta no awan ti makasango a mapan tumulong kenkuana iti rack area, ket napunnon ti conveyor, siak ti aginnanakem a mapan tumulong. No saan, aginnanakemak a mapan iti packing area a mangurnos kadagiti order iti karton sakbay a ma-tape-an sa ipakuyas manen iti kumbeyor a mapan iti shipping area.
Malagipko daydi Margarita ta masansan nga aggidgiddankami nga agmerienda. Naes-estoriana dagiti annakna, nangruna ti napagawid idiay Mexico ta natiliwan a nagdroga ditoy Utah. Kasta met ti lakayna a mekaniko a di pulos nagsursuro iti Ingles. Kunana kano man a saan met a ti pannakaammona nga ag-Ingles ti pagtrabahona no di dagiti imana.
Maysa pay a pakalagipak kenkuana ti pannakaoperana iti thyroid. Dandani kano nagtinnag a cancer. Idi kaop-operana, impupokda iti makalawas ket ibatbatida ti kanenna iti apagbingngi a rikep ti kuartona.
Nagangayanna, nadamagko a nagpa-convert iti yanko a pammati.
MAPANAK ITI DAYDI panangrugik idiay Church Office Building. Saan a pulos a napalsian ti taktakderak a pammati ti inaramid daydi kabarbaro a manager idiay International Shipping Department. Ammok nga adda latta itta.
Nadagsen a talaga ti barukongko iti daydi umuna nga aldaw a panag-report-ko idiay Mail Operations, iti basement ti 27 a kadsaaran a pasdek ti COB. Tinengtengngelko ti riknak ta no mabalin, diak kayat nga idanem ti tao a patiek a nangedngednged ti paniriganna iti biag. Diak kayat nga isu ti pakadadaelan ti naun-uneg a panangimutektekko iti simbaan ken iti biag.
Daydi Reese ti naipatuldo a pagpakaammuak. Isu ti lead. Naragsak, ludingas ken ipapanko a saan nga agaddayo ti edadmi.
“Glad to have you here!” tinapiknak pay.
Inyam-ammonak kadagidi nadanonko a naragsak met a nangsarabo kaniak.
Imbagana ti akem dagiti mail handler, ken no ania ken sadino ti pakaibatangan ti tunggal maysa.
Adda para bunag kadagiti dadakkel ken babassit a pakete wenno kinarton nga order.
Dua dagiti drayber ti kalalainganna ti kadakkel a trak. Daydi Lyn ti para ala/tulod kadagiti sursurat/pakete iti nadumaduma a babassit a pasdek ti CJCLDS iti lawlaw ti Salt Lake City. Sabali daydi nasapa a rummuar a mapan agala kadagiti koreo dita Redwood Road a Main Postal Office, nga idagasna nga urnosen iti extention office ti Mail Center iti ruar ti COB sakbay a maipan iti COB, a paka-sort-anda pay maminsan sakbay a maitulod babaen ti conveyor, wenno dagiti mismo a Mail Handlers ti mangikarga iti cart a pangisursorda kadagiti pito a kadsaaran ti COB, wenno iti Missionary Department, wenno iti Relief Society Building a kaariping ti COB, wenno iti Joseph Smith Building, wenno iti opisina dagiti miembro ti General Authorities.
Dua ti napusgan a mapan agala kadagiti koreo wenno pakete iti nadumaduma a disso.
Adda daydi sorter/recorder iti computer sakbay a maikabil iti bin sa ipakuyas iti conveyor a mangidanon iti no sadino nga opisina iti duapulo-ket-pito a kadsaaran.
Adda daydi babai a panglukmegen a mangisursor kadagiti koreo a di madanon ti conveyor; kaaduanna a babassit a pakete wenno napateg a sursurat para kadagiti addaan iti saad iti no sadino nga opisina.
Immuna a pinasurotnak ni Reese iti rota daydi Lyn ta siak ti mangreliebo kenkuana nga agisursor kadagiti sursurat ken pakete kadagiti nadumaduma a babassit nga opisina iti ruar ti COB.
Saan a naalay-ayan ti dagsen ti barukongko, Enos Apok, iti kaaddaak iti Mail Operations. Nabayag bassit sakbay a nailiwliwagko. Isu nga iti panagmammanehok iti trak, diak inin-intunaran no umno ti ar-aramidek. Naminsan, iti iruruarko a mapan agitulod iti bagahe, naisagirad ti bakrang ti trak iti dakkel a poste iti ruaran. Iti sumuno nga aldaw, inawagandak iti ngato ket impalawagda ti nasken nga aramidek. Inikkandak ti kopia dagiti alagaden ti drayber ti trak. Didak met ketdi inikkat, a diak met kayat no awan ti sisasagana nga akarak.
Idi kuan, saan laengen a daydi Lyn ti riniliebuak; daydi payen drayber a mapan agal-ala iti koreo kada bagahe idiay Main Postal Service, idiay Redwood Road, iti alas singko ti agsapa.
Iti naminsan a panagitulodko iti sursurat/pakete iti maysa a baro a disso, kinuyognak ni Reese tapno ammokton ti papanak no sisiak.
Iti panagdardarasko nga immulog, nga agpupungtotak pay laeng, diak naaluadan ti askawko iti tallo a tukad nga agdan, naitiklebak ket nadunggialan ti kanigid a tumengko. Kinuykuyognak daydi Jim Balen a 'bisormi a napan iti klinika. Mano nga aldaw a diak nakapagmaneho. Agingga ita, saanen nga impes daydi bukol iti tumengko; saan met ketdi a nasakiten.
Daydin ti naudi a panagmanehok iti trak. Siakon ti naibatang nga umuli-umulog iti pito a kadsaaran a pasdek ti COB. Agiwarasak iti sursurat, pakpakete, ken no ania payen. In-inut a naalay-ayan ti dagensen ti barukongko ta adu ti nasasayaat a tattao a naam-ammo ken nagayyemko kadagiti kadsaaran a nagitultulodak. Ita la nga ibagak: inadawko iti padasko iti COB daydi saritak nga "Adtoyak, ni Tranquilino Takneng: iti 27 a Kadsaaran a Lubong" a nangabak iti umuna a gunggona iti RFAAFIL idi 2005.
Adda daydi naminsan a panangung-unget daydi Jim a 'bisormi idiay Mail Operations, iti sangomi a mismo, iti daydi kaduami a nasingpet ken maysa a kagagetan, a tinultulongak pay a nagideliber iti kinahon a bond paper iti tunggal Mierkoles. Uray no inungtanna, ngem idiay koma opisinana, saan nga iti sangomi a kakaduana.
Diak nakapagteppel. Kinomprontak daydi Jim Balen.
“You’re not supposed to be doing that in front of us,” kinunak.
“I’m not talking with you,” kinunana.
Napanak nagpulong a dagus iti direktormi idiay 5th Floor. Kalpasan ti tallo a bulan, nayakaren daydi Jim Balen, iti nababbaba a puesto, ken iti sabali a departamento—immay met nakipagpakada idi nagretiroak.
Intultuloyko ti panagtrabahok idiay Deseret Book bayat ti kaaddak iti Mail Operations. Idinto a nakastrek idin ni Samar dita Parker Hannifin; duada ken ni Jojo.
Sakbay a saritaek ni Chichi, yunak pay ni Lingling.
Di kadi nabati da Lingling idiay Montalban? Pagammuan lattan ta nadamagmi a nakikasar iti daydi Glicerio Galvan, wenno Glen. Nalpas idin a nagmision.
Ni kano Judge Vivencio Baclig, a taga-Cabugao, ken maysa met a mannurat ken gayyem dagiti taga-Bannawag, ti nangkasar kadakuada, idi Oktubre 12, 2005. Ni la Jose ti kaduana, ken dagiti kakabagian daydi Glen. Isu a ni la Lingling ti nabatbati idiay Filipinas agingga ita. Adun a kuskos balungos ti mapaspasamak idiay Manila U.S. Embassy.
Ala, ni Chichi... Nagsubli a nagtrabaho idiay Distribution Center. Bayat ti panagtrabahona, nangala iti Interior Design dita Salt Lake Community College, dita Redwood. Saan a napukaw dagidi sigud a gagayyemna, kas kada Rosalie Mosuela, ken dadduma pay a padana a single adults.
Adda daydi nasingpet a nagarem kenkuana, nalipatakon ti naganna, a Puraw. Isuna laeng ta nagdakkel ti ariringda. Bassit ni Chichi, dakkel ti bagi daydi nobiona.
Napanunot ni Chichi a pabaruen ti kuarto idiay basement. Daydi nobiona ti timmulong, wenno isu pay ketdi ti ad-adda a naturtoran a nagobra.
Sa napanunotko met a paaladan iti sango ti balay ta kanayon nga agparugit iti asona iti karuotanmi iti sango daydi maysa a kaarubami.
Saan manen a naaw-awan daydi nagaget a dakkel-ti-bagina a nobiona.
Idi damo, saan a napampanunot ni Chichi nga isina.
Ngem naammuan daydi Manang Pacing a nanang ni Sally ti nobio ni Chichi.
“Isinam, Chichi. Nagdakkelan. Saankayo nga agkabagay!”
Piman a nobio. Saanen a nagbayag sa insina ni Chichi. Ta saan la a gapu iti panangsugsugsog daydi Manang Pacing, Mama's boy kano. Manipud idin, saandan a nagkitkita; ngem madamdamag kano ni Chichi ti mapaspasamak iti daydi nagaget a tao. Nakarabraber kanon ti barbasna, ken kasla dinan as-asikasuen ti bagina.
Nakasarak ni Chichi iti kuttong.
Ngem saanda met a nagbayag.
Idi kuan, napanunot ni Chichi ti ag-apartment a kaduana dagiti dadduma a kabarkadana. Pinanawannakami a dudua ken ni Samar.
Ngem naminsan, nangitugot iti maysa a puraw a kalbo. Return missionary kano met; nagmision idiay Russia.
Idi kuan, simmangpetda a dua.
“Adda kano ibaga ni Nathan,” kinuna ni Chichi.
I want to marry your daughter,” kinuna ni Nathan, iti pay tuktok ti agdan, nga agpadakami a nakatakder.
Idiay tuktok ti agdan; nakatakderkami!
Simmaruno a pagteng: siak ti nang-seal kadakuda idiay Draper Utah Temple. Ni Chichi ti immuna nga in-seal-ko kadagiti annakko. Kayatna a sawen, siak ti nangkasar kadakuada nga agassawa.
Ni Mimi? Adu ti naparnuayna a parikut... ngem naurnosen ti biagda nga agiina kadagidiay dua nga annakna a da LA ken Lindsay. Ken ni Richard a nagbalin a kaingungotna—isuda ti maikadua a kinasarko iti templo, idiay Salt Lake Utah Temple.
