Mairaman kadagiti imbestigaren ti Department of Justice (DOJ) ti nalatak a negosiante a ni Charlie “Atong” Ang, ken ti mapapati a dati a nakarelasionna a ni Gretchen Barretto, gapu iti pannakapukaw dagiti 100 a “sabungeros” (mammallot), kinuna ni Sekretario ti DOJ Jesus Crispin C. Remulla idi Hulio 3.
Segun ken ni Remulla, nairaman da Ang ken Barretto kadagiti maibilang a kas suspek gapu ta nadakamat ida ti maysa a saksi.
Impalgak ti saksi a ni Julie “Dondon" Patidongan nga am-ammo a kas “Totoy," iti maysa nga interbiu iti telebision, ti pannakairaman da Ang ken Barretto iti pannakapukaw ken pannapapatay dagiti mammallot.
Segun ken ni Patidongan, adda 20 a tao iti alpha list, wenno dagiti kangrunaan a grupo ti e-sabong.
Gapu iti imbutaktak ni Patidongan, nangipila ni Ang iti kaso a kriminal a maibusor kada Patidongan ken Alan Bantiles, kas iti attempted robbery with violence and intimidation, grave threat, grave coercion, incrimination against innocent persons, ken slander.
Malakanyang, saanna nga us-usaren ti ICC kontra kadagiti Duterte
Inlibak ni Ang ti pannakairamanna iti pannakapukaw dagiti mammallot ket kinunana a dumawdawat dagiti indarumna iti ₱300 a milion manipud kenkuana tapno saanda nga iraman ti naganna iti kaso.
Ngem kinuna ni Remulla a saanen a makaapektar dagiti ibagbaga ni Ang gapu ta kayatda a maammuan ti kinapudno.
Segun ken ni Remulla, agtultuloy latta ti imbestigasion ket aramidenda ti kasapulan ken saan a maaramid iti publisidad.
Nupay adu ti agkunkuna nga awan ti pagbanagan ti imbestigasion gapu ta nabileg dagiti nairaman a tattao, kinuna ni Remulla nga agibtur ti DOJ ken saan a maawan ti namnamada a maikkan iti hustisia dagiti mapukpukaw a mammallot. (Jeffrey Damicog/Manila Bulletin//Lito Hilidon/Bannawag)
