Sinuspenso ti Land Transportation Office (LTO) ti lisensia dagiti 10 a drayber ti taxi ken transport network vehicle service (TNVS) gapu iti panangkontratada ken nalabes a singirda kadagiti pasahero iti Ninoy Aquino International Airport (NAIA).
Kinuna ni daulo ti LTO Assistant Secretary Vigor D. Mendoza a natiliw dagiti 10 a drayber iti insayangkatda a random inspection idi Hunio 25 kalpasan a nagwaras ti video dagiti tallo a kaso ti nalabes a panangsingir dagiti drayber kadagiti pasaheroda iti NAIA.
Segun ken ni Mendoza, napakaammuanen dagiti drayber maipapan iti 90-aldaw a pannakasuspenso ti lisensiada babaen ti show cause order (SCO) a naited kadakuada. Kaipapanan daytoy nga awan ti trabahoda gapu iti pananggundawayda kadagiti pasahero.
Sakbay daytoy, binaon ni Mendoza ti LTO enforcer team iti tallo a terminal ti NAIA kalpasan ti panagwaras ti video dagiti tallo a kaso ti nalabes a panangsingir--maysa a drayber ti nagsingir iti ₱1,300 para iti short trip manipud Terminal 2 agingga Terminal 3, idinto a ti maysa a drayber ket nagsingir iti nasurok a ₱5,000 manipud iti Terminal 1 agingga iti Terminal 2.
Nadaras a pannakairuar ti ayuda kadagiti naapektaran ti didigra, imbilin ni Marcos
Iti sabali a bangir, im-imbestigaren ti LTO ti kaso ti maysa a drayber ti motorsiklo gapu iti panangsingirna iti ₱2,000 manipud NAIA agingga iti Cainta, Rizal.
Kinuna ni Mendoza a saanda a palubosan dagiti tao nga agtultuoy iti illegal nga aramidda, nangruna iti mismo a pagserkan iti pagilian, ta no kabaelanda nga aramiden daytoy kadagiti kailianda, naturturedda a mangaramid iti kastoy kadagiti ganggannaet a turista.
Innayon ni Mendoza a ti kastoy a kababalin ti mangibabain iti pagilian iti imatang dagiti ganggannaet a turista. (Aaron Recuenco/Manila Bulletin//Lito Hilidon/Bannawag)
