Impaulog ti Department of Education (DepEd) ti maysa a dakkel a panagbalbaliw iti annuroten iti medium of instruction (MOI) para iti Kindergarten agingga iti Grado 3, nga opisial nga ikkatennan ti mandatory a panagusar ti Mother Tongue (kabukbukodan a pagsasao) iti early-grade instruction iti entero a pagilian.

Sagudayen daytoy ti pinirmaan ni DepEd Secretary Sonny Angara ti DepEd Order No. 20, serye ti 2025, wenno ti Policy on the Medium of Instruction for Kindergarten to Grade 3 Effective School Year (SY) 2025–2026..

Nailanad iti nasao a pammilin a mangrugi iti daytoy a tawen ti panageskuela a ti Filipino (Tagalog) ken Ingles dagiti kangrunaan a medium ti instruksion kadagiti agad-adal iti Kindergarten agingga iti Grado 3.

Nasional

Nadaras a pannakairuar ti ayuda kadagiti naapektaran ti didigra, imbilin ni Marcos

“Ti MOI para iti Kindergarten agingga iti Grado 3 ket kangrunaan a Filipino ken Ingles, a pakairamanan ti Filipino Sign Language para kadagiti tuleng ken narigat ti panagdengngegna nga agad-adal,” kinuna ti DepEd maipapan iti baro a nairuar a pammilin.

“Dagiti rehional a pagsasao ket agserbi a kas katulongan a medium ti instruksion, a mausar ti translaguanging (panangipatarus) tapno masuportaran ti yaakar ti amin a tipo dagiti agad-adal manipud iti maysa a pagsasao agingga iti sabali a pagsasao,” innayonna.

Ipatungpal pagannurotan ti DepEd ti Republic Act No. 12027, a mangisardeng iti mandatory a panagusar ti Mother Tongue kas MOI ken mangipalubos laeng ti pannakausar daytoy kadagiti monolingual a klase a makatungpal kadagiti nainget a pagalagadan.

Babaen ti baro a pagannurotan, ti Filipino ken Ingles dagiti default a medium ti instruksion iti amin a lebel ti Kindergarten agingga iti Grado 3. Opsional metten ti pannakausar ti Mother Tongue ken maipalubos laeng kadagiti monolingual classroom a yan dagiti agad-adal ket agpapada ti kabukbukodan a pagsasaoda ken matungpal dagiti espesipiko a pagalagadan ti kinasagana.

Pinasingkedan pay ti DepEd ti suportana para iti pannakausar dagiti rehional ken Indigenous Peoples (IP) a pagsasao a ​​kas katulongan a medium tapno makatulong iti pannakaawat kadagiti multilingual setting. (Merlina Hernando-Malipot/MANILA BULLETIN)