Sangapulo a tawen kalpasan a naipaulog ti Republic Act No. 10687--a nangbuangay iti Unified Student Financial Assistance System for Tertiary Education (UniFAST)--ngem saan latta a natungpal ti nakairantaanna.
Daytoy ti naibutaktak iti pannakarepaso ti paglintegan ti Commission on Higher Education (CHED) nga inwayat ti Second Congressional Commission on Education (EDCOM 2).
Naipaulog ti RA 10687 idi 2015 tapno mapapardas ken maipamaysa dagiti amin nga student financial assistance programs (StuFAPs) ti gobierno kadagiti amin nga ahensia.
Ngem segun iti EDCOM2, saan pay a pulos a naipatungpal dagiti kangrunaan a pagrebbengan ti UniFAST kas iti National Student Loan Program, pannakatingiting ti StuFAPs, ken ti napagtutunos a pagalagadan ti scholarship.
Kaso nga impeachment kontra ken ni Marcos, winaswas ti Kamara
Ti UniFAST ita ti mangimatmaton iti Universal Access to Quality Tertiary Education (UAQTE) program--a pakairamanan ti Tertiary Education Subsidy (TES) ken ti Tulong Dunong Program--ngem saanna met a natungpal dagiti kangrunaan a mandato ti RA 10687.
Inlawlawag ni dati a daulo ti CHED a ni Dr. Patricia Licuanan a nupay napintas ti programa a UniFAST, naibaw-ing ti amin nga atensionna iti panangipatungpal iti libre nga edukasion babaen ti RA 10931 (Universal Access to Quality Tertiary Education Act), ket nabaybay-andan ti sigud a panggepda.
Inaklon ni Executive Director ti UniFAST Ryan Estevez a nabaybay-an ti ahensia ti annongenna kas sagudayen ti RA 10687, kalpasan a naibilin kadakuada nga isuda ti mangipatungpal iti libre a panageskuela iti kolehio.
Nalidayan met ni EDCOM 2 Co-Chair Rep. Roman Romulo iti kaawan ti progreso ti National Student Loan Program, ket kinuestionarna ti UniFAST no apay a saanda a kayat ti makikoordinar iti Development Bank of the Philippines (DBP) wenno iti LandBank, idinto nga ipalubos daytoy ti RA 10687, ken ahensia met laeng ti gobierno ti DBP ken Landbank nga addan programada nga ‘study now, pay later.’
Gapu kadagitoy a pannakaitantan, binilin ti EDCOM2 ti UniFAST a mangidatagda iti timeline ti panangtungpalda iti siam nga annongenda a dida natungpal segun iti RA 10687 agingga inton Agosto 3, 2025. (Merlina Hernando-Malipot/Manila Bulletin//Lito Hilidon/Bannawag)
