Impasigurado dagiti autoridad a natalged a sidaen ti tao ti nalatak a sardinas a tawilis ken dadduma pay a klase ti lames a masarakan iti Dan-aw ti Taal kalpasan ti panangibutaktak ti maysa a testigo nga iti nasao a dan-aw ti nakaibellengan dagiti bangkay dagiti mapukpukaw a “sabungeros” (mammallot).
Kinuna ni Bureau of Fisheries and Aquatic Resources (BFAR)-Calabarzon Regional Director Sammy Malvas a natalged a sidaen dagiti tawilis, agraman ti dadduma pay a gagangay a makalkalap a lames kas iti tilapia ken bangus manipud iti dan-aw.
Kinuna ni Malvas a gagangay nga agtalinaed dagiti tawilis kadagiti ababaw a paset ti danum ken agkaanda iti plankton, isu a saan a nga agkaan iti ania man nga agruprupsa a banag.
“Adu a lames ti makalkalapan iti Taal Lake, kangrunaanen ti tawilis. Maawagan daytoy iti planktivore wenno lames nga agkaan iti plankton wenno babassit nga organismo, isu nga awanan posibilidad a mangan iti agrupsa a banag," kinunana.
78 pay nga ebidensia, gandat nga ipila ti depensa ni Duterte para iti mapasungad a confirmation hearing iti ICC
Innayon ni Malvas a dagiti tilapia ken bangus ket matartaraken kadagiti fish pen ken mapakpakan kadagiti komersial a feeds.
Innayonna a ti maliputo, sabali pay a kita ti lames a masarakan iti Dan-aw ti Taal, ket maysa a carnivore ngem saan nga scavenger, ta agkaan daytoy kadagiti babassit nga ikan imbes nga iti agruprupsa nga organiko a banag.
Impaganetget ni Malvas a saan koma a maalarmar ti publiko kadagiti alegasion a saan a natalged dagiti lames manipud iti Dan-aw ti Taal Lake iti pannakaibelleng dagiti bangkay.
Pinainget ti BFAR-Calabarzon ti kampaniana a manglaban iti di umisu nga impormasion maipapan iti kinatalged ken kalidad dagiti lames a makalapan iti dan-aw. (Danny Estacio/MANILA BULLETIN)
