'Kudil ken tulang laengen" ni dati a presidente Rodrigo Duterte, segun iti dati nga asawana a ni Elizabeth Zimmerman, ngem impasiguradona a nasayaat ti kasasaad ti salun-at ni Duterte iti otsentan a tawen daytoy.
Iti maysa nga interbiu kadagiti pasurot ni Duterte iti The Hague, inwaragawag ti ina da Bise Presidente Sara Duterte, Davao City Rep. Paolo Duterte, ken acting Davao City Mayor Sebastian Duterte ti maipapan iti kasasaad ken salun-at ti dati a presidente.
Kinuna ketdi ni Zimmerman a nupay nakuttong, napia met latta ti kasasaad ti dati a presidente, nupay dina kano kayat daytoy ti agwatwat ta kaykayatna ti agbuya iti telebision ken maturog.
Ngem ti maysa a banag a pakaseknan ni Duterte, isu ti Davao City ken no komusta ni Sebastian a kas acting mayor.
Kaso nga impeachment kontra ken ni Marcos, winaswas ti Kamara
Indanon ni Zimmerman ti mensahe ni Duterte kadagiti pasurotna nga agawiddan ken agyaman daytoy iti panangsuportarda.
Dagiti laeng pamilia ken abogado ni Duterte ti nakasarungkar kenkuana sipud idi Marso 14, nga umuna a panagparangna iti Pre-Trial Chamber I ti International Criminal Court (ICC) tapno pormal a maipakaammo kenkuana dagiti kasona.
Naikeddeng ti confirmation of charges inton Septiembre 23. (Raymund Antonio/Manila Bulletin//Lito Hilidon/Bannawag)
