Tapno matimbeng ti dumakdakkel a pannakaigamer dagiti Filipino iti sugal, imbilin ti Philippine Amusement and Gaming Corporation (Pagcor) kadagiti amin a gaming licensees, operators, suppliers, ken system administrators nga ikkatenda amin dagiti billboard a mainaig iti sugal ken dadduma pay nga out-of-home advertisement.
“Tinudinganmi amin a licensees ken stakeholders-mi agingga iti Agosto 15 tapno naan-anay a maikkat amin nga anunsio a mainaig iti panagsugal,” kinuna ni Pagcor Chairman ken CEO Alejandro H. Tengco iti waragawagna idi Biernes, Hulio 11.
“Amin a licensees, suppliers, system administrators, ken gaming venue operators” ket naikkan iti nasurok a makabulan a mangtungpal iti baro a direktiba ti Pagcor, a naipaulog kadagiti maseknan nga entidad idi Hulio 7.
Kinuna ti Pagcor a sakupen ti order ti agpada nga static ken digital advertising materials a mangitantandudo iti panagsugal. Maidisdispley dagiti ad material kadagiti tren, bus, dyip, ken taksi.
Kaso nga impeachment kontra ken ni Marcos, winaswas ti Kamara
Segun ken ni Tengco, idinto nga addaan mandato ti Pagcor a mang-regulate iti gaming industry ken mangpataud iti revenue para iti nation-building, "dimi kayat nga itandudo ti kultura ti pannakailuod iti sugal.”
Innayonna a “ti panang-regulate kadagiti nalabes ken nasaknap a panaganunsio iti panagsugal ket kritikal nga addang iti pannakasalaknib dagiti nalaka a maapektaran a sektor ti kagimongan, nangruna dagiti agtutubo.” (Derco Rosal/MANILA BULLETIN)
