Nadayyeg ti Ilocos Norte iti magnitude 5.5 a ginggined itay 10:38 ti agsapa ita nga aldaw, Hulio 15, kas inwaragawag ti Philippine Institute of Volcanology and Seismology (Phivolcs).
Segun iti Phivolcs, adda ti sentro ti ginggined iti 21 a kilometro iti abagatan a laud ti Pasuquin, iti kauneg a 43 a kilometro.
Narikna ti Intensity V (strong) iti Bacarra, Laoag City, Pasuquin, ken Vintar iti Ilocos Norte, ken iti Cabugao, Sinait, ken Vigan City iti Ilocos Sur.
Intensity IV (moderately strong) ti narikna iti Batac City, Paoay, ken San Nicolas iti Ilocos Norte ken iti Banayoyo, Bantay, Caoayan, Magsingal, San Ildefonso, San Juan, Santa Catalina, ken Santo Domingo iti Ilocos Sur.
Nabotosan, baro nga opisial ti Ilocos Sur Provincial Capitol Press Corps
Narikna ti Intensity III (weak) it lugar a San Isidro iti Abra; Baguio City, Itogon, ken La Trinidad iti Benguet; Banaue iti Ifugao; Bontoc ken Sagada iti Mountain Province; ken Nagbukel, Narvacan, San Esteban, ken San Vicente iti Ilocos Sur.
Iti sabali a bangir, Intensity II (slightly felt) ti narikna a dayyeg dagiti adda iti Alilem, Burgos, Candon City, Cervantes, Gregorio del Pilar, Quirino, San Emilio, Santa, Santa Cruz, Santa Lucia, Santa Maria, Santiago, Sigay, Sugpon, Suyo, ken Tagudin iti Ilocos Sur.
Intensity I ti narikna dagiti agnaed iti Galimuyod, Lidlidda, ken Salcedo iti Ilocos Sur.
Segun iti Phivolcs, tectonic, wenno panaggaraw ti rengngat iti lugar, ti makagapu iti ginggined.
Pinakdaaran ti Phivolcs ti publiko nga agridam gapu kadagiti posible nga aftershock. (Ellalyn De Vera-Ruiz/Manila Bulletin//Lito Hilidon/Bannawag)
