Maysa a retirado a heneral ti polis nga innaig ti maysa a whistleblower iti kaso dagiti mapukpukaw a “sabungeros” ti nangikari a mangipila iti kaso a kriminal idinto nga inlibakna ti pannakairamanna iti operasion ti maiparit itan nga online sabong ken iti pannakapukaw dagiti "sabungeros."
Kinuna ni retirado a police lieutenant general Jonnel Estomo nga isagsaganan ti legal team-na ti legal nga opensiba kontra ken ni Julie Patidongan, alyas Dondon ken agus-usar pay iti “Totoy,” idi impalgak daytoy ti pannakairamanna (Estomo) kadagiti mapukpukaw a "sabungeros."
“Kategorikal nga ilibakko ti pannakairamanko iti ania man a wagas ken mangidatagak iti ebidensia tapno madalusan ti naganko gapu ta awan ti pammaneknek ti pannakairamanko. Idinto a diak un-unaan ti ania man nga imbestigasion, patiek a ti kinapudno ti agturay,” kinuna ni Estomo iti maysa nga statement.
“Nakasaganaak a mangsungbat iti ania man nga alegasion iti umno a forum tapno madalusan ti naganko. Adda pammatik iti impartial justice system ken due process ti linteg,” innayonna.
Kaso nga impeachment kontra ken ni Marcos, winaswas ti Kamara
Nairaman ni Estomo kadagiti polis a dinakamat ni Patidongan iti kaso dagiti mapukpukaw a "sabungeros" a mapapati a naibelleng dagiti bangkayda iti Taal Lake iti Batangas.
Imbatadna a mairaman ni Estomo iti “Alpha Group” a mangbalbalakad iti aramiden ni Atong Ang.
Segun pay ken ni Patidongan, dagiti polis ti nangkidnap kadagiti "sabungeros" a naakusaran a nagkusit wenno nagn-fix iti cockfighting matches ket imbelleng dagiti bangkayda iti dan-aw.
Kabayatan ti press conference kalpasan ti panangipilana iti kaso iti National Police Commission (Napolcom) idi Lunes, Hulio 14, imbaga ni Patidongan a nakaawat dagiti polis iti “tinontonelada” a kuarta manipud ken ni Ang nga immun-una nga intudona a kas utek iti likudan ti panagpukaw dagiti "sabungeros."
Inlibak metten ni Ang ti alegasion ken nangipila iti kaso kontra ken ni Patidongan.
Immun-una nga imbaga ti liderato ti PNP nga impasidongda ti restrictive custody ti 15 kadagiti polis a nairaman iti kaso.
Ni Estomo ti dati a mangidadaulo iti Anti-Kidnapping Group ti PNP ken iti National Capital Region Police Office (NCRPO).
Nagbalin idi agangay a deputy chief para iti Operations ti PNP ken nagbalin pay a contender para iti kangatuan a puesto ti polisia (PNP chief). Nainaganan idi agangay kas pangulo ti Area Police Command-Southern Luzon ti PNP. (Aaron Recuenco/MANILA BULLETIN)
