Impalgak ni Presidente Ferdinand Marcos Jr. ita nga aldaw, Hulio 16, ti nabayagen a maur-uray a pannakausar dagiti Dalian train iti Metro Rail Transit (MRT) 3, kalpasan ti dandani sangapulo a tawen.
"Daytoy ti umuna nga aldaw a mausaren dagiti Dalian train--sipud idi nagatang, saan pay pulos a nausar daytoy," kinuna ni Marcos iti MRT-3 Santolan-Annapolis Station.
Ginatang ti Filipinas iti ₱3.75 a bilion ti 48 a light rail vehicles idi 2014 manipud iti nakabase iti China a CCRC Dalian Co. Ngem idi maideliberen dagitoy a tren idi 2017, saan a nausar dagitoy iti sistema ti MRT-3 gapu iti technical compatibility issue.
Kalpasan ti sumagmamano a tawen a pannakaidulinna, tallo a set pay laeng ti tren--a buklen ti siam a bagon--ti mabalinen nga usaren.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Adu ti nabalbaliwan kadagiti Dalian train ngem awan ti ginasto ti gobierno ti Filipinas.
Ti TUV Rheinland, maysa a kompania iti Germany, ti nangisayangkat iti full technical audit, idinto a ti Sumitomo Corporation a kompania iti Japan, ti agdama a maintenance provider ti MRT-3, ti nangiwayat iti final safety checks.
Inton mabalinen nga usaren amin a 48 a Dalian train, umadu ti kabaelan nga ilugan ti MRT-3, ken bumassit ti baet ti oras ti panaglabas ti tren iti dua a minuto. (Darryl John Esguerra/PNA//Lito Hilidon/Bannawag)
