Nagbalinen a naan-anay a bagyo ti dati a tropical depression a ni “Crising” (international name “Wipha”) itay 2:00 iti parbangon ti Biernes, Hulio 18, bayat nga umasideg daytoy iti Amianan a Luzon, a namkuatan ti PAGASA a nangingato iti Tropical Cyclone Wind Signal (TCWS) No. 2 iti walo a lugar.
Iti waragawag ti Philippine Atmospheric, Geophysical and Astronomical Services Administration (PAGASA) itay 5:00 iti agsapa, nasaripatpatanda ni Crising iti 335 a kilometro iti daya ti Echague, Isabela, wenno iti 325 a kilometro iti daya ti Tuguegarao City, Cagayan.
Naipan iti TCWS No. 2 ti Batanes, Cagayan agraman ti Babuyan Islands, ti amianan ken daya a paset ti Isabela (Palanan, Ilagan City, Divilacan, Delfin Albano, Quezon, Tumauini, Maconacon, Santa Maria, Cabagan, San Pablo, Santo Tomas, San Mariano, Dinapigue), Apayao, amianan a paset ti Kalinga (City of Tabuk, Balbalan, Pinukpuk, Rizal), amianan a paset ti Abra (Malibcong, Lacub, Lagangilang, Licuan-Baay, Danglas, Lagayan, San Juan, Tineg, La Paz, Dolores), Ilocos Norte, ken iti amianan a paset ti Ilocos Sur (Cabugao, Sinait).
Kalalainganna ti kapigsa ti anginna kadagitoy a lugar iti sumaruno a 24 nga oras.
Recto, Estrella, Gatchalian, napusgan a mangaywan iti gobierno
Iti sabali a bangir, adda iti TCWS No. 1 ti Isabela, Quirino, Nueva Vizcaya, ti dadduma a paset ti Kalinga, Mountain Province, Ifugao, dadduma a paset ti Abra, Benguet, dadduma a paset ti Ilocos Sur, La Union, amianan a paset ti Pangasinan (San Nicolas, Natividad, San Quintin, San Manuel, Tayug, Sison, San Fabian, Pozorrubio, Laoac, Binalonan, San Jacinto, Manaoag, Mangaldan, Dagupan City, Binmaley, Lingayen, Labrador, Sual, City of Alaminos, Bolinao, Anda, Bani, Agno, Burgos, Mabini, Dasol, Calasiao, Santa Barbara, Mapandan, Bugallon), amianan a paset ti Aurora (Dilasag, Casiguran, Dinalungan, Dipaculao, Baler, Maria Aurora), amianan a daya a paset ti Nueva Ecija (Carranglan, Pantabangan), Polillo Islands, Camarines Norte, Catanduanes, ken amianan a daya a paset ti Camarines Sur (Caramoan, Garchitorena, Lagonoy, San Jose, Presentacion, Tinambac, Siruma, Goa).
Saan unay a napigsa ti anginna kadagitoy a lugar.
Mapan a 65 a kilometro tunggal oras iti asideg ti sentrona ti kapigsa ni Crising, ken pugso nga agingga iti 80 a kilometro tunggal oras.
Agpaamianan a laud ni Crising ket agdisso iti Cagayan wenno iti Babuyan Islands ita a malem wenno rabii.
Segun iti PAGASA, agtultuloy a pumigsa ni Crising ket posible nga agbalin a severe tropical storm inton agsapa wenno malem ti Sabado, Hulio 19.
Imballaag ti PAGASA a napigsa ti tudona kadagiti sumarsaruno nga aldaw gapu ken ni Crising ken iti napapigsa nga abagat (southwest monsoon). (Ellalyn De Vera-Ruiz/Manila Bulletin//Lito Hilidon/Bannawag)
