Mangrugi a mabukel ti quad-committee (quad-comm) version 2.0 iti Kamara ti maika-20 a Kongreso, segun ken ni La Union 1st district Rep. Paolo Ortega V.
Kinuna ni Ortega a paset ti "Young Guns" bloc ti Kamara, idi Huebes, Hulio 17, a masapul a mabukel manen ti quad-comm, a naggapu iti maika-19 a Kongreso, ta adu pay ti saan a nalpas nga imbestigarenda a para iti lehislasion.
Buklen ti quad-comm iti maika-19 a Kongreso ti uppat a komite, ti Committee on Dangerous Drugs, Committee on Public Order and Safety, Committee on Human Rights, ken ti Committee on Public Accounts. Ni dati a Surigao del Norte 2nd district Rep. Robert Ace Barbers ti over-all chairman daytoy.
Insayangkat ti quad-comm ti 15 a nagsasaruno a hearing iti mapapati nga agkakanaig a kaso ti Philippine Offshore Gaming Operators (POGO), illegal a droga, panangkamkam dagiti Intsik iti daga, ken extrajudicial killings (EJK) a nainaig iti war on drugs ni dati a presidente Rodrigo Duterte.
Manipud kadagitoy a hearing, nabukelda ti nadumaduma a singasing a paglintegan kas iti gakat a mangideklarar iti EJK a kas heinous crime, pannakaiparit iti POGO iti Filipinas, pannakaamendar ti Anti-Money Laundering Act, ken panangipasdek iti panatitinnulong dagiti ahensia iti panagimbestigar kadagiti kaso iti panaglabsing iti human rights.
Video ti China Daily, kinondenar ti DFA
Segun ken ni Ortega, kasapulan a mabukel manen ti quad-comm ta adu manen dagiti rumrummuar nga isyu, kas iti kaso dagiti mapukpukaw a mammallot ("sabungeros") a mabalin a biktima ti EJK a mainaig iti war on drugs ni Duterte.
Kinompirmar ni Dip. Bienvenido “Benny” Abante Jr. (Manila 6th district), ti kakaisuna a nakasubli a co-chairman ti orihinal a quad-comm, ti tarigagayda a buklen manen ti komite. (Ellson Quismorio/Manila Bulletin//Lito Hilidon/Bannawag)
