Nangrugi daytoy a kas pagraragsakan iti konsierto ti Coldplay: Kiniddaw ti lead singer a ni Chris Martin kadagiti retratista ti bunggoyna nga alaanda iti ladawan/video dagiti agbuybuya bayat ti panangkantana iti “Jumbotron Song.” Maipakita iti dakkel nga iskrin (jumbotron) dagiti ladawan/video.
Iti dayta a konsierto a naangay iti Gillette Stadium iti Massachusetts idi Mierkoles (itoy a lawas), immuna a timmakder manipud iti ummong dagiti agbuybuya ti maysa a lalaki a nakasuot iti birthday sash.
Kalpasanna, naitampok ti dua a tao a nakakawes iti banana costume.
Addada pay sabali a simmaruno a naalaan iti ladawan. Iti sumagmamano a segundo, adda kasla agassawa a naipabuya iti dakkel nga iskrin. Nakaisemda; adda ti lalaki iti likudna, binalkot ti lalaki ti babai kadagiti takiagna; iti mismo a barukong ti babai. Ngem idi makitada ti bagbagida iti dakkel nga iskrin, kellaat nga inapput ti babai ti rupana sa nagkummog ti lalaki sa immadayoda tapno di maalaan ida ti kamera.
Senado, pinasingkedanna ti ₱6.793-trilion a nailian a badiet para 2026
“Mabalin nga adda relasionda. No saan, managbabainda la unay (Either they’re having an affair or they’re just very shy),” inyangaw ni Martin.
Ngem saan a nagpatingga dita ti pasamak. Nag-viral ti video. Nakita ti sangalubongan.
Ngem asino kadi dagitoy a naalaan ti kamera?
Saan a dagus a mapasingkedan ti Associated Press ti kinaasino dagiti agassawa.
Ngem kuna dagiti internet sleuth a ti lalaki, isu ti chief executive officer ti maysa a kompania a nakabase iti U.S., idinto a ti babai, isu ti chief people officer — iti sabali a pannao, isu ti pangulo ti human resources ti isu met laeng a kompania.
Saan a simmungbat ti pannakangiwat ti kompania idi nakiddaw a pasingkedanna ti kinaasino ti lalaki ken ti babai a naipakita iti kamera. Ngem kinunana iti e-mail a “peke dagiti ladawan.” Idi agangay, nangiruar ti kompania iti maysa a pakaammo a mangibagbaga a linuktanna ti imbestigasion mainaig iti pasamak, ngem saan a direkta a naibaga no asino dagiti empleado ti kompania a naiparang iti video.
Saan met a simmungbat ti babai tapno lawlawaganna ti kinaasinona. Kasla na-deactivate metten ti LinkedIn page ti lalaki. Saan a nagballigi dagiti panagpadas tapno makontak ti lalaki kadagiti dadduma a numero a nainaig iti naganna iti direktorio.
Kinuna ti pannakabagi ti Coldplay nga awan ti komento ti banda mainaig iti pasamak.
Palagip kadagiti mapmapan kadagiti konsierto: kaaduan a lugar a pakaangayan dagiti konsierto ket addaan kadagiti karatula a mangipakaammo kadagiti agdengdengngeg/agbuybuya a mabalin a maalaanda iti ladawan/video bayat ti konsierto.
Ti lugar, iti daytoy a kaso, ti Gillette Stadium iti Foxborough, addaan met iti privacy policy online a kunana: “No sumarungkarkayo iti lokasionmi wenno tumabuno wenno makipasetkayo iti maysa nga okasion iti lokasionmi, mabalin a maalaankayo ti ladawan, timek ken/wenno kaaspingyo, agraman ti panangusarmi kadagiti CCTV camera ken/wenno no maipelikula wenno maretratodakayo iti kastoy a publiko a lugar.” (Associated Press)
