Inikkat ti Meta, ti kompania nga akinkukua iti Facebook, ti page ti sumagmamano kadagiti nalatak a content creator wenno vlogger ken influencer iti social media gapu iti panangiprompromotda iti illegal nga online a sugal, segun iti digital advocacy group a Digital Pinoys.
Nagtinnulong ti Digital Pinoys ken ti Cybercrime Investigation and Coordinating Center (CICC) a nangkiddaw iti Meta tapno malapdan ti pannakaitandudo ti online a sugal kadagiti Filipino iti social media.
Mairama kadagiti naikkat ti page-na iti Facebook da Boy Tapag (addaan 5.5 a milion a followers), Sachzna Laparan (9.7 a milion a followers), Mark Anthony Fernandez (242,000 a followers), ken Kuya Lex TV (100,000 a followers).
Segun iti Digital Pinoys, aganay a 20 a content creator ti naitudo ken naisumite a ma-review.
“Agyamankami iti Meta iti nadaras a panagtignayda iti nagtinnulonganmi iti CICC a panangkiddaw a mai-take down ti pages dagiti influencer a sipaparayag a mangitantandudo iti illegal nga online gambling. Inanamaenmi a maikkat pay dagiti nabati a page a nai-flag iti umuna a report-mi kadagiti sumarsaruno nga aldaw,” kinuna ni Digital Pinoys National Campaigner Ronald Gustilo. (rva)
