Simmangpet ni Presidente Ferdinand Marcos Jr. iti Washington, DC tapno rugianna ti tallo nga aldaw nga opisial a panangsarungkar tapno mapapigsa ti panagkadua ti Filipinas ken Estados Unidos (US) ken mangitandudo iti panagrang-ay iti negosio, panagpuonan, ken pannakitinnulong iti seguridad.
Nagdisso ti eroplano ti presidente iti Joint Base Andrews iti 2:48 iti malem ti Domingo (oras iti US). Da Philippine Ambassador to the U.S. Jose Manuel Romualdez ken U.S. Ambassador to the Philippines MaryKay Carlson ti nangpasangbay iti presidente.
Daytoy ti umuna a panangsarungkarna iti Washington iti panagakem ni US President Donald Trump--ken isu ti umuna a daulo ti pagilian iti Southeast Asia a sangailien ni Trump sipud panagakemna a kas presidente ti US.
Segun iti Department of Foreign Affairs (DFA), ti depensa ken seguridad iti taaw ti kangrunaan a panggep ti isasarungkar ni Marcos iti Washington, nangruna ti agtultuloy a riribuk iti West Philippine Sea. Impaganetget ni Marcos ti pateg ti Mutual Defense Treaty ken ti dumakdakkel a panagtinnulong ti Armed Forces of the Philippines ken ti US Forces.
DOH, namakdaar iti posible a pannakadangran iti Traslacion
Mairaman iti opisial a programa ni Marcos manipud Hulio 20 agingga 22 ti pannakisaritana kada U.S. Secretary of State Marco Rubio ken Defense Secretary Pete Hegseth, sakbay a makapatangna ni Trump iti White House.
Malaksid kadagitoy, panggep ni Marcos nga allukoyen dagiti Amerikano nga investor a mangisaksaknapen iti negosioda iti Filipinas.
Kinuna ni Marcos nga ilungalongna ti tulag a bilateral trade a mangep-ep iti epekto ti naipangato a taripa. (Argyll Cyrus Geducos/Manila Bulletin//Lito Hilidon/Bannawag)
