Maysa iti dua a low-pressure area (LPA) nga adda iti Philippine Area of Responsibility (PAR) ti mabalin nga agbalin a tropical depression iti las-ud ti 24 nga oras ken mangpapigsa pay iti abagat (southwest monsoon) iti mapasungad nga al-aldaw, segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 22.
Kinuna ni weather specialist ti PAGASA Obet Badrina a dakkel ti posibilidad a pumigsa ti LPA nga adda iti 1,140 a kilometro iti daya ti Central Luzon.
Ti maysa pay nga LPA, adda iti 370 a kilometro iti daya ti Calayan, Cagayan.
No maysa kadakuada ti agbalin a bagyo iti uneg ti PAR, mapanaganan daytoy iti “Dante.”
Iti sumaruno a 24 nga oras, ti ipus ti LPA iti asideg ti Cagayan ti mangyeg iti naulep a tangatang ken panagtudo iti Cagayan Valley.
Grupo dagiti mangmangged, nagkamang iti SC mainaig iti TRO ti ₱85 a nayon a sueldo
Marikna latta ti nepnep iti Metro Manila, Cavite, Laguna, Batangas, Rizal, Quezon, Zambales, Bataan, Pampanga, Bulacan, ken Occidental Mindoro.
Binallaagan ti PAGASA dagiti agindeg kadagiti nalaka a malayus wenno agreggaay a lugar nga agridamda. (Ellalyn De Vera-Ruiz/Manila Bulletin//Lito Hilidon/Bannawag)
